नरेन्द्र ढकाल/गोरखा
पौष २२ गते । भूकम्पको केन्द्रबिन्दु जिल्ला गोरखाका केही गैरलाभग्राहीहरुले अनुदान रकम फिर्ता गरेका छन् । पहिलो किस्ता बापतको ५० हजार बुझेर पनि घर नबनाएका १७ जनाले रकम फिर्ता गरेको राष्ट्रिय पुर्ननिर्माण प्राधिकरण जिल्ला आयोजना कार्यान्वनय इकाई (अनुदान व्यवस्थापन तथा पूर्वाधार) गोरखाले जानकारी दिएको छ ।
रकम फिर्ता गर्ने मध्ये अधिकाशं अन्यत्र घरभएका लाभग्राही छन् । ‘गैरलाभग्राहीहरुले लिएको रकम फिर्ता गर्नका लागि सूचना जारी गरेका थियौं’ जिल्ला आयोजना कार्यान्वयन इकाईका प्रमुख रामशरण आर्याचले भने ‘त्यस्तो संख्या कति छ त यकिन छैन, तर अहिले सम्म १७ जनाले रकम फिर्ता गर्नुभएको छ ।’ ७० हजार ७६८ लाभग्राही रहेको गोरखामा हालसम्म ६३ हजार १ सय जनाले पहिलो किस्ता लिएका छन् । पहिलो किस्ता लिने मध्ये जम्मा ५३ हजार २९२ जनाले मात्र दोश्रो किस्ता लिएका छन् । पहिलो किस्ता लिएको लामो समयसम्म पनि ९ हजार ८०८ जनाले दोश्रो किस्ता लिएका छैनन् । उनीहरु मध्ये अधिकाशंलाई घर आवश्यक नभएको देखिन्छ । ‘हामीसँग आधिकारिक तथ्याङ्क त छैन’ आर्चायले भने ‘तथ्याङ्क उपलब्ध नभएसम्म पहिलो किस्ता बुझेका सबैले रकम फिर्ता गनुपर्छ भन्न सक्ने कुरा भएन, तर यो संख्या धेरै हुन नसक्ने अनुमान गर्न सकिन्छ ।’
सोही अनुरुप गैरलाभग्राहीको तथ्याङ्क संकलन गर्नका लागि प्राधिकरणले काम सुरु गरिसकेको छ । पहिलो किस्ता लिएर पनि घर नबनाउने मध्ये कतिपय गरिब, अशक्त, जेष्ठ नागरिकहरु रहेका छन । कतिपय भने अयन्त्र घर भएका, एकै घरको दुईजनाको नाम लाभग्राही सूचीमा समावेश भएका लगायत रहेको प्राधिकरणका कर्मचारी बताउँछन् । अयन्त्र घर भएकाहरु र एकाघरका व्यक्तिले अनुदान नपाउने प्राधिकरणको नियम छ । त्यसैले रकम फिर्ताको अभियान सुरु गरिएको हो । ‘हामीले स्थानीय तहका साथीहरुसँग त्यहाँको बास्तविक तथ्याङ्क उपलब्ध गराइदिन आग्रह गरिसकेका छौं’ उनले भने ‘त्यसपछि मात्र गैरलाभग्राही कति छन भन्ने यकिन हुन्छ ।’ राष्ट्रिय पुर्ननिर्माण प्राधिकरणले गैरलाभग्राहीलाई पुस १५ गतेसम्म रकम फिर्ताको लागि समय छुट्याएको थियो । उक्त समय सिमा भित्र जम्मा १७ जनाले मात्र आफूले लगेको पहिलो किस्ता बापतको अनुदान रकम फिर्ता गरेका हुन् । यदी गैरलाभग्राहीले लिएको रकम फिर्ता नगर्ने हो भने सरकारी बाँकी सरह असुल उपर गर्ने प्राधिकरणले बताउँदै आएको छ ।
यस अघि दोहोरो सुबिधा लिएको भन्दै सिरानचोक गाउँपालिका ८ जौवारीका ८४ लाभग्राहीसँग पहिलो किस्ता रकम फिर्ता लिइएको थियो । त्यहाँ लुथरन रिलिफ सर्भिस र स्वाँरा सघन गाउँबिकास केन्द्र नामक गैरसकारी सस्थाले पिडितलाई अनुदान रकम उपलब्ध गराएकाले सरकार मार्फत प्राप्त भएको ५० हजार फिर्ता गरिएको हो । संघ सस्थाले बनाएको स्थानका १६ घरले अझै रकम फिर्ता गर्न बाँकी रहेको राष्ट्रिय पुर्ननिर्माण प्राधिकरण जिल्ला आयोजना कार्यान्यवन इकाई अनुदान व्यवस्थापन तथा स्थानीय पूर्वाधार गोरखाले जानकारी दिएको छ ।
भूकम्प केन्द्रबिन्दु गोरखामा अहिलेसम्म पनि पुर्ननिर्माणको कामले पूर्णता पाउन सकेको छैन । हालसम्म ४३ हजार २४७ घर मात्र निर्माण सम्पन्न भएको छ । भूकम्पमा आंशिक क्षति पुगेका ५ हजार २०६ घर प्रवलीकरण अनुदानको सूचीमा रहेको छन् । ती मध्ये ८५५ जनाले पहिलो र ५ घरले दोश्रो किस्ता लिएका छन् । प्रवलीकरण अनुदानको काम पनि निकै सुस्त देखिएको छ । प्राधिरणले छुट्याएको समय सकिएपनि जिल्लामा उल्लेख्य मात्रमा रकम फिर्ता हुन सकेको छैन ।
