गोरखा समाचारदाता
राज्यले अस्पतालमा दरबन्दी अनुसारका चिकित्सक खटाउनु पर्ने राष्ट्रिय सभाका प्रमुख प्रतिपक्षी दलका नेता सुरेन्द्रराज पाण्डेले बताएका छन् । बुधबार आँपपिपल अस्पतालको भवन उद्घाटन गर्दै उनले स्वास्थ्य सस्थालाई स्रोत साधनले भरिपुर्ण बनाउने पर्नेमा जोड दिए । ‘दरबन्दी छ तर डाक्टर छैन अनि नागरिकले कसरी सेवा पाउँछन ?’ उनले भने ‘राज्यले गाउँगाउँका सबै स्वास्थ्य सस्थामा दरबन्दी अनुसारको चिकित्सक खटाउनु पर्छ ।’ विशेषज्ञ २ जना डाक्टर सहित १७ जनाको सरकारी दरबन्दी रहेको उक्त अस्पतालमा अधिकाशं पद रिक्त छन् । ‘मैले मन्त्रीलाई भनेर हुन्छ, मन्त्रालयमा समन्वय गरेर हुन्छ वा सदन कुरा उठाएर हुन्छ’ उनले भने ‘दरबन्दी अनुसार डाक्टर र अन्य स्वास्थ्यकर्मी खटाउन पहल गर्छु ।’ दरबन्दी अनुसारका स्वास्थ्यकर्मी उपलब्ध नभएपछि साबिकको अस्पताल बिकास समितिले करारमा डाक्टर एवं स्वास्थ्यकर्मी नियुक्त गरी सेवा दिइरहेको छ । अहिले अस्पतालमा एक जना विषेशज्ञ, एक जना डाक्टर सहित अन्य कर्मचारी र स्वास्थ्यकर्मी गरी ५१ जना कार्यरत छन् ।
केही वर्ष अघिसम्म आँपपिपल अस्पताल नेपालकै उत्कृष्ट रहेको प्रशङ्ग जोड्दै नेपाली काँग्रेसका युवा नेता समेत रहेका पाण्डेले अस्पतालको सेवा खस्किनबाट रोक्नु पर्ने बताए । सोको लागि आवश्यक स्रोत साधनको व्यवस्था गर्नुका साथै भरपर्दो सडक सञ्जालले अस्पताललाई जोड्नु पर्ने उनको भनाई छ । सोही अनुरुप सभा चौताराबाट अस्पताल सम्मको सडक स्तरउन्नतीका लागि केन्द्र सरकारसँग पहल गर्ने नेता पाण्डेले प्रतिवद्धता व्यक्त गरेका छन् । अस्पताललाई ५० शैयामा रुपान्तरण गरी मेडिकल कलेज सञ्चालन गर्न उनले प्रस्ताव समेत गरेका छन् ।
यसैगरी गण्डकी प्रदेश सभा सदस्य हरिशरण आर्चायले अस्पतालको स्तरउन्नतीका लागि आफूले सक्ने पहल गर्ने बताएका छन् । ‘यो अस्पताल हामी सबैले उपचार गराएको ठाउँ हो’ उनले भने ‘यसलाई साधनस्रोत सम्पन्न बनाउने जिम्मेवारी पनि हाम्रै हो ।’ सोही अनुरुप ठाँटी पोखरी डुम्रे हुँदै अस्पताल आउने सडक स्तरउन्नतीका लागि प्रदेश सरकारसँग पहल गरिरहेको आर्चायको भनाई छ ।
२०७२ बैशाख १२ गते गएको बिनाशकारी भूकम्पले क्षतिपुगेको करिब ४५ वर्ष उक्त भवन जापानी सहयोग नियोग जाइकाले निर्माण गरेको हो । ६ करोड ५९ लाख लागतमा पुर्ननिर्माण गरिएको २२ कोठे उक्त भवनबाट बरिङ्ग र आकस्मिक सेवा सञ्चालन गरिएको अस्पतालका प्रशासकिय अधिकृत बाबुराम गिरीले जानकारी दिए । यस अघि भबन निर्माण नहुँदा बिरामी भर्ना, जाँचमा समस्या भएको थियो । ‘बहिरङ्ग र आकस्मिक सेवा सञ्चालन गर्न निकै असजिलो भएको थियो, अब त्यो समस्या हटेको छ’ उनले भने ‘यसले अस्पतालको सेवाप्रवाहमा निकै मद्दत पुग्छ भन्ने मैले विश्वास लिएको छु ।’
उक्त भबन निर्माणको लागि नेपाल मेड जर्मनीले १९ लाख रुपैयाँको फर्निचर सहयोग गरेको छ । यस अघि भबन निर्माण गर्न जमिन सम्याउँदा र भबन भत्काउँदा पनि उक्त संस्थाले सहयोग गरेको अस्पतालले जनाएको छ । अस्पतालमा अहिले दैनिक ८० जना ओपिडि र २० जनासम्म बिरामीले आकस्मिक सेवा लिने गरेका छन् । ग्रामिण भेगमा रहेर पनि विशेषज्ञ सेवा प्रदान गर्दै आइरहेको उक्त अस्पतालले अत्याधुनिक उपकरण सेवा दिइरहेको छ । ओेपिडि, ल्याब, एक्सरे, भिडियो एक्सरे, दाँत, फिजियो थेरापी, फार्मेसी सबै लगायतका सेवाले अस्पतालले प्रवाह गरिहेको डाक्टर क्षितिजचन्द्र पौडेलले जानकारी दिएका छन् । नगर प्रमुख एवं अस्पताल व्यवस्थापन समिति अध्यक्ष दिपकबाबु कंडेलको अध्यक्षतामा भएको कार्यक्रममा प्रमुख अथिती प्रमुख प्रतिपक्ष दलका नेता पाण्डे, गण्डकी प्रदेशका सांसद हरिशरण आचार्य, पालुङटार नगरपालिकाका उपप्रमुख पम्फा बसेल वडा अध्यक्षहरु, स्थानीयको उपस्थिती रहेको थियो । भुकम्पमा भत्किएको अस्पताल भबन निर्माण भएपछि उपचारमा सहज हुने भन्दै स्थानीय पनि खुसी भएका छन्।
