मोहसिन अलि मियाँ/गोरखा
मंसिर १९ गते । साविकको बुंकोट गाविसबाट गाउँघर आयुर्वेद क्लिनिक सेवा सुरु भएको छ । आयुर्वेदिक चिकित्सा सेवालाई प्रभावकारी रुपमा गाउँगाउँमा विस्तार एवं समुदायको पहुँचमा पु¥याउने उदेश्यले बुंकोटमा सेवाको सुरुवात गरिएको हो । शहिद लखन गाउँपालिका वडा नम्बर ७ र ८ को संयुक्त पहलमा सेवाको विस्तार गरिएको हो । ‘हामी आयुर्वेद स्वास्थ्य सेवालाई गाउँगाउँमा विस्तार गर्न खोज्दै छौ’ वडा नम्बर ८ का वडाध्यक्ष काशीनाथ अम्गाईले भने ‘अब ७ र ८ का जनताले गाउँमै यो सेवा पाउने गरी सुरुवात भएको छ ।’
जिल्ला आयुर्वेद स्वास्थ्य केन्द्रको सहयोग र सहकार्यमा बुंकोटमा अब हरेक महिनाको दुई दिन आयुर्वेद स्वास्थ्य चेकजाँच संचालन गरिने वडाध्यक्ष अम्गाईको भनाई छ । सेवाको मंगलबार एक कार्यक्रमका बिच उद्घाटन भएको छ । हरेक महिनाको २ र १८ गते संचालन हुने क्लिनिकबाट कविराजबाट स्वास्थ्य चेकजाँच गराइनुका साथै निशुल्क रुपमा औषधी समेत वितरण गरिने उनले बताए ।
मंगलबार बुंकोट प्रशिक्षण केन्द्रमा भएको शिविरबाट १ सय १५ जनाले सेवा लिएका छन् । कविराज प्रभात सुवेदी नेतृत्वको ७ जनाको टोलीले क्लिनिकमा चेकजाँच गराएका थिए । जसमध्ये ७३ जना महिला र ४२ पुरुषले सेवा लिएको अम्गाईले बताए । कविराज सुवेदीको अध्यक्षतामा भएको क्लिनिक उद्घाटन कार्यक्रममा वडा नम्बर ८ का अध्यक्ष अम्गाईको प्रमुख आतिथ्यता एवम वडा नम्बर ७ का वडाध्यक्ष शरण श्रेष्ठको बिशेष आतिथ्यता रहेको थियो । त्यस्तै हरेक महिनाको दुई दिन क्लिनिक संचालन गर्न अम्गाईको अध्यक्षतामा ५ सदस्यिय ब्यवस्थापन समिति समेत गठन गरिएको छ । जसको सदस्यहरुमा वडाधयक्ष शरण श्रेष्ठ, वडासचिव तोयानाथ अम्गाई, रेडक्रस बुंकोटका सभापति मदन प्रसाद लम्साल र कविराज प्रभात सुवेदी रहेका छन् ।
