गोरखा समाचारदाता
मंसिर ६ गते । लाप्राकको गुप्सीपाखामा निर्माणाधिन एकिकृत नमूना बस्तीको काम आउँदो बैशाख सम्म सम्पन्न हुने एआरएनएले दाबी गरेको छ । गैर आबासिय नेपाल सघं एनआरएनएले निर्माण गरिरहेको उक्त वस्तीको काम धमाधम भइरहेकाले भूकम्प स्मृती दिवशको अवसरमा आउँदो बैशाख १२ गते सम्म घर हस्तान्तरण गर्ने तयारी गरिएको हो ।
‘ग्राउण्ड फ्लोर सबै भन्दा गाह्रो हो त्यो सबै काम सकिएको छ’ उक्त परियोजना प्रमुख इन्जिनियर लक्ष्मण अर्याल भने ‘अब गारो लगाउने मात्र काम बाँकी छ, यो धेरै छिटो हुन्छ ।’ उक्त बस्तीको सबै ५ सय ७३ घरको झ्याल ढोका राख्ने काम सकिएको छ भने त्यहाँ सम्म इट्टाको गारो समेत लगाइएको छ । १०० भन्दा बढि घरको छाना छाउने काम सकिएको र अन्यको पनि छानाको काम भइरहेका उनले बताए ।
३२५ वटा घरमा इट्टाको गारो लगाउने काम पनि सम्पन्न भइसकेको छ । ती मध्ये २०० घरमा ट्रस समेत राखिएको छ भने तला माथि क्लक लगाउने काम बाँकी रहेको एनआएएनएले जानकारी दिएको छ । १५ घरमा भने ब्लक समेत लगाइएको छ । ‘गारोको काम सकिएपछि तला माथि एससी लाइट ब्रिक लगाउने हो’ उनले भने ‘अहिले उक्त ब्रिकको धमाधम ढुवानी भइरहेको छ ।’
भौगोलिक बिकटता र मौसम प्रतिकुलताले काम गर्न निकै समस्या भएको एनआएएनएले बताएको छ । वर्खामा सामाग्री ढुवानीमा समस्या भएका कारण झण्डै ५ प्रतिशत कार्यप्रगती ह्रास भएको इन्जिनियर अर्यालले बताए । ‘अहिलेको प्रगती हेर्दा ५२ प्रतिशत काम भइसकेको छ, मौसम र भुगोल हाम्रो बाधक भयो’ उनले भने ‘तर जटिल काम सकिएकाले अब धमाधम प्रतिशत बढ्छ ।
अहिले सामान ढुवानीको काम भइरहेकाले हिउँ पर्नु अघि छाना छाउने तयारी गरिएको छ । त्यसपछि हिउँ परेपनि भित्र बसेर काम गर्न मिल्ने उनको भनाई छ । ‘सबैको घरको छाना छाइसकेपछि हिउँ परेपनि भित्र बसेर काम गर्ने हाम्रो योजना छ’ उनले भने ‘फिनिसको कामलाई हिउँ परेपनि त्यति अवरोध नहोला ।’ नेपाली सेनाका १ सय ५४ र सोही मात्र अन्य कामदारहरुले उक्त बस्ती निर्माणको काम गरिरहेका छन् । भौगोलिक रुपमा विकट र पटक/पटक मौसम प्रतिकुलताले काममा समस्या हुँदा एनआरएनएले तोकिएको समय घर निर्माण सकेको छैन ।
