मोहसिन अलि मियाँ/गोरखा
कात्र्तिक १५ गते । गोरखा सदरमुकाम स्थित एक पसलको सटर फुटाएर नगद चोरी भएको छ भने अर्को पसलमा चोरीको प्रयास भएको छ । गोरखा नगरपालिका ६ हरमटारीमा रहेको एम एण्ड एस इन्टरप्राइजेजमा बुधबार बिहान सटर फुटाएर पसलमा भएको नगद ५ हजार चोरी भएको हो । त्यस्तै सोही पसल नजिकै रहेको अर्को कुवँर सप्लायर्समा सटर फुटाई चोरीकोको प्रयास भएको छ ।
एम एण्ड एस इन्टरप्राइजेजमा बिहान ३ः५६ बजे चोरी भएको संचालक किरण श्रेष्ठले बताएका छन् । ‘हाम्रो सिसि क्यामेराको रेकर्ड अनुसार बिहान ३ बजेर ५६ मिनेट जादा चोरले सटर फुटाएको देखिन्छ’ उनले भने ‘सामान त केहि लगेनछन् तर ५ हजारको हाराहारीमा खुद्रा पैसा थियो त्यो सबै लगेछन् ।’
तर पसलमा भएको सिसि क्यामेरा भने मंगलबार बेलुका १० बजे नै माटोले पोतेर टालिएको अवस्थामा फेला परेको संचालक श्रेष्ठले बताएका छन् । ‘सटर फुटाउन चोर बेलुकादेखि नै योजनाबद्ध ढंगबाट लागेको रहेछ, पसल बाहिरको सिसि क्यामेरामा बेलका १० बजे नै माटोले पोतेर टालिएको रहेछ’ उनले भने ‘अनि राती आएर सटर फुटाएछ, भित्रको क्यामेरामा त्यो सबै देखिन्छ तर अनुहार देखिएको छैन ।’
त्यस्तै सोही पसलको केहि माथी रहेको कुवँर सप्लायर्समा भने ४ बजेपछि सटर फुटाउने प्रयास भएको प्रहरीको भनाई छ । सटर फुटाउदै गर्दा गस्तिमा रहेका प्रहरीले थाहा पाएपछि उनिहरु भागेका थिए । ‘सटर फुटाउदै गर्दा प्रहरीले थाहा पाएछन्, प्रहरीलाई देख्ने बित्तिकै उनिहरु भागेछन’ जिल्ला प्रहरी कार्यालयका इन्सपेक्टर झबिन्द्र भट्टराईले भने ‘सटर फुटाउने २ जना रहेछन्, सटर फुटाउन भने पाएनन, राती भएकाले पहिचान गर्न भने सकिएन ।’ यस घटनापछि प्रहरीले खोजतलास गरिहेको उनको भनाई छ ।
केहि समय अघि सोही पसल नजिकै आयुर्वेदचोकमा रहेको एक मदिरा पसल र कालिमाटीका पसलमा समेत सोही प्रकृतीको चोरी भएको थियो । तर अहिलेसम्म पनि ति चोरहरुलाई प्रहरीले पक्राउ गर्न भने सकेको छैन । त्यस्तै बसपार्कमा रहेको नमस्ते मोबाइलबाट भएको चोरीमा संलग्न भएका भारतिय २ जनालाई प्रहरीले भारतबौ पक्राउ गरी केहि समयपछि उनिहरुलाई धरौटीमा रिहा गरेको छ ।
