गोरखा समाचारदाता
असोज २८ गते । यो दशैमा पनि भक्तजनले मनकामनाको नयाँ मन्दिरमा पुजा गर्न नपाउने भएका छन् । दशै अघि मन्दिर निर्माण सम्पन्न गरी सर्वसाधरणका लागि खुल्ला गर्ने बताउँदै आएको जिर्णोद्धार समितिले उक्त कुरा असम्भव देखिएको दाबी गरेको छ । ‘सबै भक्तजनसँग माफी माग्दछु, हाम्रो लक्ष्य पुरा भएन’ जिर्णोद्धार समितिका अध्यक्ष नरेन्द्रबाबु श्रेष्ठले भने ‘यो दशैमा पनि भक्तजनले नयाँ मन्दिरमा पुजा गर्न पाउनु भएन ।’ २०७४ चैत्र मसान्त सम्मका मन्दिर जिर्णोद्धार सम्पन्न गर्ने लक्ष्यका काम सुरु गरिएपनि समितिले पटक/पटक भाका राख्दै आएको थियो ।
पछिल्लो पटक यो दशैसम्म सक्ने समितिले दाबी थियो । ‘मन्दिरको काम त सबै सकिएको छ, आँगनमा ढुङ्गा छाप्ने काम बाँकी हुँदा अहिले खुल्ला गर्न सकिएन’ उनले भने ‘दशै लगतै ढुङ्गा छाप्ने काम गर्छौ र मन्दिर खुल्ला गर्ने सोच छ ।’ आगामी तिहार सम्म ढुङ्गा छाप्ने काम सम्पन्न गर्ने श्रेष्ठको दाबी छ । यस वर्षको दशैमा पनि भक्तजनले मन्दिर परिसरमा राखिएको मनकामना भगवतीको प्रतिमा मै पुजा गर्नुपर्ने भएको छ । ‘अन्य काम गर्दा गर्दै वर्खा लागि हाल्यो, वर्खामा ढुङ्गा ल्याउन सकिएन’ अध्यक्ष श्रेष्ठले भने ‘पानी कम हुने बित्तिकै काम सुरु गरेको हो तर भ्याइएन ।’ मन्दिर परिसरमा छाप्नका लागि नुवाकोटबाट ढुङ्गा ल्याएको समितिले वर्खाका कारण मनकामना जाने कच्ची सडक अबरुद्ध भएपछि कुरिटारमै थन्क्याएर राखेको थियो ।
नाकाबन्दी, काठ अभाव लगाएतका विभिन्न कारणले तोकिएको समय भन्दा धेरै ढिला काम भएको समितिको दाबी छ । १८ किलो सुनको जलप लगाएर निर्माण गरिएको उक्त मन्दिरमा विशेष साइत हेराएर दशकर्म पुजा गर्ने समितिको तयारी छ । ‘माघ अगाडी दशकर्म पुजाको साइत जुरेको छैन, त्यसले काम सक्ने बित्तिकै सर्वसाधरणका लागि मन्दिर खुल्ला गर्छौं’ अध्यक्ष श्रेष्ठले भने ‘साइत जुरेपछि राष्ट्र प्रमुखको उपस्थितीमा दशकर्म पुजा गर्ने हाम्रो योजना छ ।’ उहीँ ठाउँमा, पहिलेको जस्तो मन्दिर बनाइएकाले उद्घाटन भने नहुने उनले स्पष्ट पारेका छन् । ‘जिर्णोद्धार गरिएका मन्दिरको उद्घाटन भन्ने हुँदैन’ श्रेष्ठले भने ‘दशकर्म पुजा नै हाम्रो लागि विशेष हो ।’ नेपालकै ऐतिहासिक उक्त मन्दिर करिब १२ करोड लागतमा निर्माण सम्पन्न हुने समितिको विश्वास छ । ‘सबै हिसाव किताब हुँदैछ’ अध्यक्ष श्रेष्ठले भने ‘अब छिटै अडिट गराएर लागत विवरण सार्वजानिक गछौं ।’
लामो इतिहास बोकेको उक्त मन्दिरको जिर्णोद्धार गर्नुपर्ने चर्चा चलेको धेरै वर्ष भएको पनि २०७२ साउनबाट सुरु भएको हो । २०७२ बैशाख १२ गते गएको विनाशकारी भुकम्पले मन्दिर दक्षिण पश्चिम ढल्किएपछि जगै बाट भत्किाएर पुनर्निमाण थालिएको थियो ।
सधै जसो खचाखच भक्तजन हुने मनकामना मन्दिरमा दशैमा झनै भिड लाग्ने गर्छ । तर यसवर्ष पनि भक्तजनले अघिल्ला वर्षमा जस्तै मन्दिर परिसरमा राखिएको देवीको प्रतिमामा पुजा गरेर चित्त बुझाउनु पर्ने वाध्यता छ ।