गोरखा समाचारदाता
असोज २८ गते । बिजयी दशमी सुरु भएसँगै गाउँगाउँमा यात्रुबाहक सवारी साधन पुगेका छन् । वर्खा सकिएपछि दशै परेकाले यसवर्ष जिल्लाका अधिकाशं सडकमा बस पुगे पनि यात्रा भने कष्टकर रहेको यात्रुहरुको गुनासो छ ।
जिल्लामा सञ्चालित यातायात व्यवासायी समितिलेहरुले यात्रुको चाप अुनसारको आवश्यक सवारी प्रवन्ध नगर्दा कष्टकर यात्रा गर्नुपर्ने बाध्यता रहेको सर्वसाधारणको भनाई छ । ‘भनेको बेला गाडी पाइदैन, बल्लबल्ल पाइयो भने पनि सिट पाइदैन’ आरुघाट बसपार्कमा भेटिएका सनबहादुर गुरुङले भने ‘चाडबाडको बेला वर्षेनी सधै यस्तै हो ।’ व्यवसायीले चाडपर्वका मौका छोपी नियमित क्यू भन्दा रिजर्भमा बढि बस चलाउँदा यात्रुको चाप थेग्न मुस्किल भएको कतिपय व्यवसायी बताउँछन् । ‘कतिजना काउन्टर कन्ट्याकमै छैनन, सक्नेलाई मन लाग्दी छ’ एक व्यवसायीले भने ‘क्यू अनुसार सबै हिड्ने हो भने यो समस्या नै आउँदैन ।’ नियमित क्यूमा चलेका बसहरुमा पनि टिकट पाउन मुस्किल भएको यात्रुहरुको गुनासो छ । ‘टिकट लिन आयो पहिलै बुक भईसकको हुन्छ, आफ्ना मान्छे हुनेले मात्र टिकट पाइरहेका छन’ बसपार्कमा भेटिएकी अञ्जु भण्डारीले भनिन ‘केटाकेटी साना छन सिट पाइदै घर पनि कसरी जानु ?’ ग्रामिण सडकमा बस चलाउँदै आएको यातायात व्यवसायी समिति गोरखाले भने जिल्लाका कुनै पनि रुटमा समस्या नरहेको दाबी गरेको छ ।
केही दिन अघि मात्र सडक मर्मत गरेपछि गाउँगाउँमा गाडी पुगेकाले दशै मनाउन गाउँजाने र दशैका लागि किनमेल गर्न सदरमुकाम आउनेको चापले सो क्षेत्रमा चल्ने यात्रु बाहक बसहरु खचाखच भएका हुन् । केही अझै यो क्रम बढेर जाने देखिन्छ । अधिकाश बसहरुले क्षमता भन्दा बढि यात्रु बोक्ने गरेको पाइन्छ कतिपय स्थानमा भने जिप, भ्यान लगायत मालबाहक सवारी साधन समेत यात्रु बोक्न प्रयोग भएका देखिन्छन् । रिजर्भ भनेर हिड्ने अधिकाशं सवारी साधनले चर्को भाडा समेत असुलेको यात्रुको आरोप छ ।
यसैविच जिल्लाका अधिकाशं सडकमा दशै अगाडी बस सञ्चालन भएपनि केही सडक भने मर्मत हुन नसकेको स्थानीयको गुनासो छ । केही दिन अघि जिल्ला प्रशासन कार्यालयमा बसेको सरोकारवालाहरुको बैठकले अशोज २० गते सम्म गत वर्ष यातायात सञ्चालन भएका सबै सडक मर्मत गरी सवारी सञ्चालन गर्ने निर्णय गरेको थियो । पन्थडिही कडहरे, लुइँटेल भञ्याङ ठाँटीपोखरी लगायतका सडकमा रकम सुनिश्चित नभएको भन्दै ठेकेदारले मर्मतका लागि आनाकानी गरेका छन् ।
