जिल्लाका अधिकाशं स्थानीय तहले वर्खाको कारणले काम गर्न नसकिएको बताएका छन् । अधिकाशं ग्रामिण इलाकामा रहेका गाउँपालिकाको केन्द्र सम्म आउजाउमा पनि समस्या हुँदा अन्य काम गर्न नसकिएको उनीहरुको भनाई छ । ‘हाम्रो पहिलो प्राथमिकता अबरुद्ध सडक सुचारु गर्नु हो’ बारपाक सुलिकोट गाउँपालिकाका प्रमुख विष्णु भट्टले भने ‘बर्खाका कारण सडक मर्मतको काम गर्न पाएका छैनौं ।’ असार मसान्त अगाबै नीति तथा कार्यक्रम र बजेट ल्याएका स्थानीय तहहरुले वर्खाको कारण बिकास निर्माण काम गर्न नपाए पनि आन्तरिक तयारी भइरहेको बताएका छन् । ‘योजनाको काम सुरु हुन सकेको छैन, तयारीमा चाँही छौं’ पालुंटार नगरपालिकाका प्रमुख दिपकबाबु कंडेलले भने ‘अब केही दिनमा वडाहरुमा काम सुरु हुन्छ ।’ पालुंटारमा रकम अख्तियारी आइसकेको उनले बताए । कतियपय स्थानीय तहमा भने रकम अख्तियारी पनि नआउँदा समस्या भएको स्रोतले बताएको छ ।
यता गोरखा नगरपापालिकाले भने मंगलबारबाट योजना सम्झौता नै सुरु गरेको छ । ‘वर्खाले काम गर्न दिएन, पानी केही कम भएको छ’ गोरखा नगरपालिकाका प्रमुख राजनराज पन्तले भने ‘अब धमाधम काम सुरु हुन्छ ।’ गोरखा नगरपालिकाले अशोज भित्र योजना सम्झौता सम्पन्न गर्ने लक्ष्य लिएको छ । सोही अनुरुप सम्पूर्ण वडाहरुलाई पत्राचार गरिसकिएको नगरपालिका श्रोतले बताएको छ । ‘योजना सम्झौता गराउँनुस् भनेर वडाहरुमा पत्राचार गरिसकेका छौ’ उनले भने ‘केही दिनमा प्राविधिक टोली पठाएर काम सुरु गरिहाल्छौं ।’ अहिले वडा कार्यालयलहरुले योजना सम्झौताका लागि उपभोक्ता समिति गठनको काम गरिरहको भन्दै उनले केही दिनमा ठूला ठेक्काको पनि सूचना जारी हुने बताए । गोरखा नगरपालिकाले जेठ १५ भित्र योजना सम्पन्न गर्ने समयसिमा बनाएको छ ।
सदरमुकाममा रहेका गोरखा नगरपालिकाको कार्य सम्पदानमा समेत वर्खाले असरको गरेको बताइरहदा गाउँमा रहेका स्थानीय तहले काम गर्न सकेका छैनन् । ‘मेरा गाउँपालिका भित्रको सडक मर्मत गरिसकेको छु तर अन्यत्रको बाटो नबन्दा केही यातायात चल्न सकेको छैन’ आरुघाट गाउँपालिकाका प्रमुख पुर्ण बहादुर दाहालले भने ‘बाटो नहुँदा सम्म केही काम गर्न सक्ने अबस्था छैनन ।’ अहिले आवतजावतमा समेत समस्या भएको भन्दै जनअपेक्षा अनुसारको काम गर्न नसकेकीको बताएका छन् । यस वर्ष लामो समय पानी परेकाले जिल्लाका अधिकाशं कच्ची सडक ठप्प भएपछि स्थानीय तहको काम समेत प्रभावित भएको हो । अधिकाशं बैंक तथा वित्तिय सस्था सदरमुकाममा छन् । वर्खाको कारणले गर्दा आर्थिक कारोवारमा समेत समस्या भएको छ ।
