नरेन्द्र ढकाल/गोरखा
साउन २३ गते । सुलिकोट ४ सौरपानीका स्थानीयहरुलाई अब बिरामी पर्दा अब स्टेचर र डोली चढ्नु नपर्ने भएको छ । सौरपानीमा जन्मिएर पढाई तथा रोजगारको शिलशिलामा देश बिदेशमा पुगेका युवाहरुले सामाजिक सञ्जाल मार्फत चलाएको अभियान मार्फत खरिद गरिएको एम्बुलेन्स सेवाको मंगलबार उद्घाटन गरिएको छ । ‘धेरै खुसि लागेको छ, अब उपचार नपाएर मर्नु पर्दैन की’ सौरपानीका स्थानीय पार्वती ढकालले भनिन् ‘बोक्ने मान्छे पनि चाहिएन छिटो पुग्न पाइयो ।’ लामो समय देखि बेलायतमा बस्दै आएका रुद्ध ढकाल, जापानमा रहेका ईश्वर ढकाल, नेपाल कार्यरत ईश्वर पनेरु लगायतका युवाहरुले समाजिक सञ्जाल मार्फत सुरु गरेको अभियान अन्तर्गत २० लाख रुपयाँ संकलन गरेका छन् ।
सोही रकम मध्येबाट एम्बुलेन्स खरिद गरिएको हो । ‘भूकम्प जाने बित्तिकै रुद्ध दाई नेपाल जानुभएको रहेछ, गाउँलेले एम्बुलेन्स नहुँदा दुखः पाएको गुनासो गरेछ’ अभियान्ता मध्येका एक हाल जापानमा रहेका ईश्वर ढकालले भने ‘उहाँले हामीहरुसँग छलफल सुरु गर्नुभयो अनि अभियान अघि बढ्यो ।’ सामाजिक सञ्जाल मार्फत थालिएको अभियानमा नेपालबाट १७ लाख ५१ हजार २११, जापानबाट १ लाख ५८ हजार ९५१ र बेलायतबाट २ लाख १८ हजार रुपयाँ संकलन भएको हो । ‘५ लाख गाउँपालिकाले सहयोग गरेको थियो अरु सबैले स्वतस्फूर्त रुपमा हामीलाई मायाँ गर्नेहरुले अभियानलाई सहयोग गर्नुभएको हो’ उनले भने । यस अघि बिरामीलाई स्टेचर र डोकोमा बोकेर स्वास्थ्य सस्था लैजादै गर्दा धेरै जनाको ज्यान गएको थियो । अब भने दुखःका दिन गएका भन्दै स्थानीयले खुसि व्यक्त गरेका छन् ।
उक्त एम्बुलेन्स सेवाको एक कार्यक्रमका विच प्रदेश सभा सदस्य प्रकासचन्द्र दवाडीले उद्घाटन गरेका छन् । ‘मेरो पनि सपना साकार भएको छ, यस क्षेत्रका सके सबै वडामा नसके पनि गाउँपालिकामा भएपनि एउटा एम्बुलेन्स उपलब्ध गराउने योजना थियो’ उनले भने ‘साथीहरुको ठूलो मेहनतले सौरपानीबासीले एम्बुलेन्स पाउनुभएको छ, हामी सबै हर्षित छौ ।’ गाउँमा एम्बुलेन्स आएपनि सडकको अबस्था नाजुक रहेको भन्दै गोरखा क्षेत्र नम्बर २ को प्रदेश सभा ‘ख’ बाट निर्वाचित सांसद दवाडीले सडक स्तरउन्नतीका लागि पहल गर्ने आश्वासन पनि दिएका छन् । ‘एम्बुलेन्स भएर मात्र हुँदैन गुड्ने सडक चाहियो, अब हाम्रो ध्यान सडक स्तरउन्नीमा केन्द्रित हुन्छ’ उनले भने ‘मैले गर्नुपर्ने पहल सुरु गरिसकेको छु ।’
फरक राजनितिक प्रशङ्ग बोल्दै प्रदेश सभा सदस्य दवाडीले स्थानीय तहले गर्ने बिकास निर्माणका काममा दलिय राजनिति अन्त्य हुनुपर्ने बताएका छन् । अब सबैको ध्यान बिकास र समृद्धीमा केन्द्रित हुनुपर्ने राजनिति आस्थाका आधारमा स्थानीय हुने कामले राम्रो नतिजा नदिने उनको दाबी छ ‘अब पनि हामी बिकासका नाम राजनिति गर्छौ भने हामी धेरै पछि पर्छौ, यसले अब यस्तो राजनिति बन्द गर्नुपर्छ ।’
२० लाख रकम संकलन गरी एम्बुलेन्स सञ्चालन गर्न लागेका सौरपानीबासीले झण्डै ८ लाख रकम भने सौरपानी स्वास्थ्य चौकी व्यवस्थापन समितिको नाममा कोष निर्माण गरी बचत गरेका छन् । ‘उक्त रकमको व्याज र बिरामीले तिरेका शुल्कबाट ड्राईभरलाई तलब दिएर एम्बुलेन्स चलाउने योजना बनाएका छौ’ अभियान्ता ढकालले भने ।
सुलिकोट गाउँपालिका अध्यक्ष बिष्णु भट्टको अध्यक्षता तथा प्रदेशसभा सदस्य दवाडीको प्रमुख अतिथ्यतामा भएको कार्यक्रममा वडा नं ४ का अध्यक्ष भिम बहादुर गुरुङ, नेपाली काग्रेसका गाँउ पार्टी अध्यक्ष बिरबहादुर गुरुङ, हिमालय माविका प्रधानाध्यापक ठाकुर प्रसाद पनेरु, उलप्रसाद पनेरु, स्वास्थ्यचौकी इन्चार्ज अनिता पनेरु, दिनेश खनखवास, मोहन ढकाल, सुजन गुरुङ, कुलप्रसाद न्यौपाने, सन्त बहादुर गुरुङ, विर बहादुर गुरुङ, ईश्वर पनेरु, भुपाल गुरुङ ंलगायतले मन्तव्य राखेका थिए । सोही अबसरमा प्रदेश सभा सदस्य दवाडीले सुलिकोट गाउँपालिका ४ को सौरपानी र ३ को स्वाँरामा नेपाल टेलिफोन टावर राख्नेको लागि प्राविधिकहरु झिकाएर सर्बे गराएका छन् ।
