नरेन्द्र ढकाल/गोरखा
साउन ६ गते । मध्ये वर्खा चलिरहेको छ । दिन रात पानी परिरहन्छ । एक छिन पानी रोकिन पाउदैन गोरखा सदरमुकाम देखि गोरखा दरबार जाने सडक मर्मत लागि कामदारहरु जुटि हाल्छन् । त्यहाँ सडक बोर्ड र गोरखा नगरपालिकाको साझेदारीमा किशोर निर्माण सेवा एण्ड सप्लार्यसले सडक मर्मतको काम गरिरहेको छ । पहिले कालोपत्रे गरिएको सडकमा परेका खाल्डाखुल्डी पुर्ने र उक्त ठाउँमा कालोपत्रे गर्नका लागि ४० लाख बजेटमा ठेक्का स्वीकृत भएको हो । असार मसान्तमा आएर काम सुरु गरेको किशोर निर्माण सेवाले गरेको काम गुणस्तरहिन भएको गुनासो स्थानीयले गरेका छन् । ‘दिनभर काम गरे जस्तो गर्छन, पानी आउँछ उत्तिखेरै बगाएर लैजान्छ’ सतिपिपलकी भिमकुमारी गुरुङले गुनासो गरिन् ।
गरिएको काम कहि क्षणमै पानीले बगाएर लैजादा पनि काम नरोकिएको प्रति स्थानीयले आक्रोश व्यक्त गरेका छन् । वर्खाको समयमा सडक मर्मतका काम गराएर नगरपालिकाले बजेट सक्ने काम मात्र गरेको उनीहरुले आरोप लगाएका छन् । यता गोरखा नगरपालिकाले भने पानी परेका बेला काम गर्न नदिएको दाबी गरेको छ । ‘लगातार पानी परेकाले हामीले केही दिनका लागि काम रोक्न लगाएका छौ’ गोरखा नगरपालिकाका सूचना अधिकारी एवं इन्जिनियर प्रकास ढकालले भने ‘पानी परेको बेला त पिच गर्ने कुरै आउँदैन् ।’ तर स्थानीय भने उक्त कुरा मान्न तयार छैनन् ।
झण्डै १५ दिन अघि काम थालेको ठेकेदार कम्पन्नीले अहिले सम्म २०० मिटर कालोपत्रे, ७०/८० मिटर बेस निर्माण र सतिपिपलबाट छहरे धारामा सम्म कटिङको काम गरेको किशोर निर्माण सेवा एण्ड सप्लार्यसका विष्णु थापा मगरले बताए । आर्थिक वर्षको अन्तिममा मात्र ठेक्का स्वीकृत भएकाले वर्खामा काम गर्नु पर्ने बाध्यता भएको भन्दै उनले पानी परेको बेला कालोपत्र नगरेको दाबी गरे । ‘ठेक्का पनि ढिलो स्वीकृत भयो, तर पनि मैले बिग्रार्ने हिसाबको काम गरेको छैन’ ठेकेदार थापाले भने ‘पानी परेका बेला अरु काम गरेको छु, नपरेको बेलामा मात्र पिचको काम हुन्छ ।’
काम थालेको १५ दिन भएपनि झण्डै १ महिना अघि देखि तयारी थालेको भन्दै उनले विभिन्न कारणले काम गर्न समस्या भएको बताए । ‘२४ घण्टा गाडी हिडिरहन्छ, रोकेर काम गर्न पाइदैन, रोक्न खोज्यो सबै तिरबाट प्रेसर आउँछ, पानी नपरेको दिन पनि ढुक्कले काम गर्ने अबस्था छैन्’ थापाले भने । सडक कालोपत्रे गर्नका लागि घाम लागेको समय आवश्यक पर्ने इन्जिनियरहरु बताउँछन । उपर्युक्त तापक्रम बिनै गरिएको पिच धेरै दिन नटिक्ने विज्ञहरुहरुको भनाई छ । ‘वर्खाको समय तापक्रम नपुगी गरेको पिच काम लाग्दैन, हामीले उहाँहरुलाई टेम्परेच मेण्टेन नगरी काम गर्न दिएका छैनौं’ इन्जिनियर ढकालले भने ‘म आफै साइड उपस्थित भएर प्रत्येक्ष निगरानी राखिरहेको छु ।’
अहिलेसम्म निर्माण सम्पन्न भएको काममा पानीले कुनै असर नगरेको इन्जिनियर ढकालको दाबी छ । निर्माणाधिन अवस्थामा केही सामान बगाए पनि बनेको संरचना राम्रो भएको उनले बताए । उक्त क्षेत्रको भत्किएको सडक तत्काल पिच नगरे थप क्षती हुने भएकाले पनि वर्खामा मर्मतको काम गर्नुपरेको नगरपालिकाले बताएको छ । ‘हाम्रो चाहना वर्खामा पिच गर्ने होइन्, तर यथाशिघ्र त्यहाँको सडक मर्मत हुन सकेन भने झनै जिर्ण बन्ने देखिन्छ’ इन्जिनियर ढकालले भने । पिचको काम केही समय रोकेर मौसम सुधार भएपछि मात्र गर्ने उनको भनाई छ ।
