कैलासबावु श्रेष्ठ/गोरखा
साउन ३ गते । देशभरका चिकित्सकहरु डा.गोबिन्द केसीको समर्थन हडतालमा उत्रिएका छन् । जुम्लामा २० दिन देखी अनशनरत डा.केसीको मागबारे सरकार गम्भीर नभएको भन्दै चिकित्सकहरु १ दिने हडतालमा उत्रिएका हुन् ।
नेपाल चिकित्सक संघले एक विज्ञप्ति जारी गरेर बिहीबार देशभरका सरकारी स्वास्थ्य संस्थामा आकस्मिकबाहेकका सेवा बन्द गर्न आग्रह गरेको थियो । देशभरका चिकित्सक तथा स्वास्थ्यकर्मीहरुको आवाज सरकारसम्म पुर्याउन यस्तो कदम चाल्नु परेको चिकित्सक संघले जनाएको छ ।
केसीको स्वास्थ्य र मागप्रति सरकार संवेदनशील नभए भोली देखी नै देशभरका स्वास्थ्य सेवा अनिश्चितकालका लागि बन्द गर्न बाध्य हुने समेत संघले सरकारलाइ चेतावनी दिएको छ ।
यसअघि त्रिवि शिक्षण अस्पतालका आवासीय चिकित्सकले केसीको माग सम्बोधन गर्न आकस्मिकबाहेकका सेवा ठप्प पारेका थिए ।
यता चिकित्सक संघ हडतालमा उत्रिए पनि नेपाल कम्युनिस्ट पार्टी ९नेकपा० निकट स्वास्थ्यकर्मी भने सहभागी नहुने भएको छ । अखिल नेपाल प्रगतिशील जनस्वास्थ्यकर्मी महासंघ र राष्ट्रिय चिकित्सक संघले पत्रकार सम्मेलन गरेर स्वास्थ्य संस्था बन्द गर्ने निर्णयप्रति बुधबार नै असहमति जनाएका थिएँ ।
गोरखा अस्पतालका चिकित्सक पनि हडतालमा
डा.गोबिन्द केसीको समर्थनमा गोरखा जिल्लामा रहेको सरकारी तथा निजी स्वास्थ्य संस्थामा कार्यरत सबै चिकित्सक बिहीबार हड्तालमा उत्रिएका छन । आकस्मिक सेवा बाहेक अन्य सेवा बन्द गराएर उनीहरु हड्तालमा उत्रिएका हुन ।
सदरमुकाममा रहेको गोरखा अस्पतालका स्वास्थ्कर्मीले पनि अफिस समय सुरु भए देखी आकस्मिक बाहेक अन्य सेवा ठप्प पार्दै हडतालमा उत्रिएका छन । स्वास्थ्य क्षेत्रमा लागेको सामान्य देखी बिशेषज्ञ चिकित्सक समेत आफ्नो नियमीत काम छाडेर डा. केसीको मसर्थनमा हड्तालमा उत्रिएका हुन ।
‘डा.केसीको समर्थनमा केन्द्र देखी भएको निर्णय अनुसार हामीले हड्ताल गरेका हौ । अकस्मिक सेवा भने पालै पालो हेरेका छौ’ भन्छन गोरखा अस्पतालका एक चिकित्सक ।
