मोहसिन अलि मियाँ/गोरखा
असार २४ गते । गोरखा नगरपालिका वडा नम्बर ८ स्थित सिमलगैरीमा दशैसम्म घरघरमा खानेपानी पुग्ने भएको छ । आर्थिक बर्ष २०७४÷७५ मा वडा नम्बर ८ बाट बिनियोजन भएको ३० लाख रकमबाट निर्माणाधिन खानेपानी आयोजनाको निर्माण कार्य अन्तिम चरणमा पुगेको वडाअध्यक्ष कृष्ण केसीले बताएका छन् । ‘लगभग काम अन्तिम चरणमा पुगेको छ, अब घरघरमा धारा जोड्न मात्रै बाँकी हो, अब दशैसम्ममा पानी झर्छ’ अध्यक्ष केसीले भने ‘हामीले अघिल्लो बर्ष छुट्याएको रकम सकिएर केहि समय काम अड्कियो ।’
चालु आर्थिक बर्षमा वडाकै सबैभन्दा ठूलो योजनाको रुपमा रहेको सो सिमलगैरी खानेपानी आयोजनाबाट ८५ घरधुरी लाभान्वित हुने बताइएको छ । हालसम्म २०÷२० घनमिटरका दुईवटा ट्यांकी निर्माण, पम्प हाउस, इन्टेक, करिब ९ सय मिटर पाइपलाइन बिस्तार लगायतका काम सम्पन्न भइसकेका छन् । तर विनियोजित रकम सकिएपछि अब बाकी काम भने कारितासले गर्ने प्रतिवद्धता जनाएको वडअध्यक्ष केसीले बताएका छन् । ‘हामीले नगरपालिकाबाट छुट्याइएको रकमबाट लगभग ८५ प्रतिशत काम सकेका छौ, अब घरघरमा धारा, मिटर जडान गर्ने, पम्प, प्यानल बोर्डको काम मात्रै काम बाँकी छ’ उनले भने ‘त्यो काम कारीतासले गर्ने भनेर सहमती भइसकेको छ ।’
स्थानीय तहको चुनाव प्रचारका क्रममा आफुले एक बर्षभित्रै पानी ल्याइदिने बाचा गरेअनुसार योजनाको काम भइरहेको उनको भनाई छ । ‘त्याहा पहिल्यैदेखि नै पानीको समस्या थियो, मैले चुनावमा बाचा गरेको थिए, त्यै भएर पहिलो बर्ष नै सबैभन्दा बढि रकमको योजना बनाएको हुँ’ वडाअध्यक्ष केसीले भने ‘म वडाको सबै ठाँउको अध्ययन गर्दैछु, कहा के आवस्यकता छ त्यै अनुसार योजना बनाएर अघि बढ्ने सोचमा छु ।’
