मोहसिन अलि मियाँ/गोरखा
रोटरी क्लब अफ गोरखाले भुराज बृक्ष प्राथामिक विद्यालयलाई प्रविधि मैत्री बनाउने अभियान थालेको छ । गोरखा नगरपालिका वडा नम्बर ११ मा रहेको सो विद्यालयमा अध्ययनरत विद्यार्थीलाई इ–लर्निङ मार्फत पठन पाठन गराउन क्लबले अभियान थालेको हो । ‘हामी यस विद्यालयलाई रोटरी मोडेलमा विकास गर्ने सोचमा छौ, सदरमुकामबाट नजिकै रहेर पनि धेरै अभाव झेलिरहेको हामीले देखेका छौ, अब यसको विकासमा हामी नेतृत्व लिन चाहान्छौ’ क्लबका अध्यक्ष किशोरजंग थापाले भने ‘यो स्कुललाई केहि बर्षअघि देखि हामीले निरन्तर सहयोग गर्दै आएका छौ, भोलीका दिनमा विद्यालयको विकासका निम्ती योजना बनाएरै हामी सहयोग गर्दै जाने सोचमा छौ’ ।
बुधबार विद्यालयलाई इ लर्निङ्गका लागि आवस्यक सामाग्री हस्तान्तरण गर्दै अध्यक्ष थापाले अब विद्यार्थीलाई प्रविधीबाट टाढा बनाउन नहुने बताएका छन् । ‘अब कितावका पाठ मात्रै घोकाएर हुदैन, विद्यार्थीलाई टेक्नोलोजीमैत्री बनाउन जरुरी छ’ उनले भने ‘यसले विद्यार्थीको बौद्धिक क्षमता समेत बढाउछ’ ।
क्लबले विद्यालयमा पुगेर एक थान ल्यापटप, एक थान प्रोजेक्टर, एक थान प्रोजेक्टर स्ट्याण्ड पर्दा, कम्युटर टेवल, टि टेबल सहित ५० दर्जन कापी हस्तान्तरण समेत गरेको छ । रोटरी डिडिएफको आर्थिक सहयोगमा क्लबले सहयोग सामाग्री हस्तान्तरण गरेको क्लबका सचिव कृष्ण ढकालले बताएका छन् । हस्तान्तरण कार्यक्रममा बोल्दै गोरखा नगरपालिकाका नगरप्रमुख राजनराज पन्तले राज्यले सबै समस्या एक्लै समाधान गर्न सम्भव नरहेकाले सामाजिक संस्थाहरुको सहयोग आवस्यक रहेको बताएका छन् । ‘देश बनाउने जिम्मेवारी र दायित्व सबैको हो, सामाजिक संघसंस्था सबै जिम्मेवार बन्न जरुरी छ, सबै एकजुट भएर लाग्यौ भने परिवर्तन हुन समय लाग्दैन’ नगरप्रमुख पन्तले भने । साथै उनले विद्यालयको शैक्षिक सुधारका निम्ति आफु प्रतिवद्ध रहेको र आगामी बर्षदेखि विद्यालयमा एक शिक्षकको दरबन्दी समेत थप गर्ने प्रतिवद्धता ब्यक्त गरेका छन् ।
सदरमुकामबाट नजिकै रहेर पनि हालसम्म विद्यालय विद्युतको पहुँच बाहिर रहेकाले रोटरी क्लब अफ गोरखाले तत्काल विद्युत जडान गरिदिने भएको छ । ‘हामीलाई यहाँ आएपछि अचम्म लाग्यो, आजसम्म बिजुली छैन, विद्यर्थीले कम्युटर आजसम्म देखेकै छैनन्’ क्लबका पूर्वअध्यक्ष एवम टिच कमिटीका संयोजक नकुल थापाले भने ‘भोलीनै हामी विजुली जोड्न प्रक्रिया अघि बढाउछौ’
