मोहसिन अलि मियाँ/गोरखा
असार ६ गते । पूर्वयुवराज पारस शाह धार्मिक भ्रमणका लागि गोरखा आईपुगेका छन् । मंगलबार ऐतिहासिक मनकामना मन्दिरको दर्शन गरेका शाह बुधबार गोरख दरबार र गोरखानाथ मन्दिरको दर्शन गर्न भन्दै गोरखा आएका हुन् ।
मंगलबार बेलुका गोरखा सदरमुकाम आइपुगेका उनि लक्ष्मीबजार स्थित होटल गाँउ रिसोर्टमा बसेका थिए । करिब ३०–३५ जना सहयोगी सहित गोरखा आइपुगेका शाहले मंगलबार बेलुका नै जिल्ला स्थित राजसंस्था निकट र राप्रपाका नेता कार्यकर्तासंग भेटघाट समेत गरेका थिए ।
धार्मिक भ्रमणका लागि शाहवंशिय उद्गम स्थल गोरखा शाह बिहान ९ बजे लक्ष्मीबजारबाट मोटरसाइकल ¥याली सहित गोरखा दरबार पुगेका थिए । शाह वंशले गोरखाको गोरखकाली र गोरखनाथलाई कुल देवताको रुपमा पुजा गर्ने परम्परा छ । सोही अनुरुप पुजाआजाका लागि उनी जिल्ला आएका उनी निकट व्यक्तिहरुले बताएका छन् । गोरखा दरबार र गोरखनाथ मन्दिरमा करिब डेढ घण्टा पुजा गरेर उनी गोरखा संग्राहलय अवोलोकन सहित आफ्ना पूर्खा पृथ्वी नारायण शाहको शालिकमा माल्यार्पण गर्न पुगेका थिए ।
‘गुरु गोरखनाथको आर्शिवाद लिन पूर्वयुवराज गोरखा आउनु भएको हो, अब धर्म संस्कृती, राजसंस्था र जनता जोडिन आवस्यक छ’ उनका सहयोगी सोम बिक्रम सिंहले भने ‘उहाँको यो भ्रमण विशुद्ध धार्मिक भ्रमण हो’
गोरखा संग्राहलयमा उनलाई संग्राहलयका कर्मचारीले फुलमाला सहित स्वागत गरेका थिए । नेपाल एकिकरणमा आफ्ना पूर्खाले प्रयोग गरेका हात हतियार अवोलोकन गर्दै कर्मचारीसंग बिभिन्न जिज्ञासा समेत राखेका थिए । करिब ४५ मिनेटको अवोलोकन पश्चात उनि संग्राहलय परिसरमै रहेको पृथ्विनारायण शाहको शालिकमा माल्यार्पण गर्दै बाहिरीएका थिए ।
