गोरखा — घर बनाउन काठ चाहिएर निवेदन दिएका भूकम्पपीडितले वर्ष दिनपछि बल्ल पाएका छन् । २ सय ६३ जनालाई ९० प्रतिशत राजस्व छुटमा काठ उपलब्ध गराइएको जिल्ला वन पैदावार आपूर्ति समितिले जनाएको छ ।
भूकम्पपीडितलाई सहुलियत दरमा उपलब्ध गराउन गोरखा ल्याइएको काठ देउरालीस्थित रबर उद्योग परिसरमा । फाइल तस्बिर : कान्तिपुर
काठ चाहिनेहरूबाट समितिले २०७३ फागुनदेखि जेठसम्म निवेदन संकलन गरेको थियो । निवेदन दिएमध्येका ३ सय १८ जनाको प्रक्रिया पूरा भए पनि ५५ जना लिनै नआएको समितिले जनाएको छ । वन विभागको आदेशअनुसार जिल्ला वन कार्यालय चितवनले गोरखाका भूकम्पपीडितका लागि ९ हजार ७ सय ३७.७२ क्युबिक फिट काठ उपलब्ध गराएको थियो ।
चितवनबाट काठ ल्याइएपछि वितरण गरिएको समिति सचिव कृष्णप्रसाद भट्टले बताए । ‘७ हजार ८ सय ८०.१६ क्युबिक फिट काठ वितरण गर्यौं,’ उनले भने, ‘अब हामीसँग १ हजार ८ सय ५७.५६ क्युबिक फिट बाँकी छ ।’ बाँकी काठ वितरणका लागि पुन: आवेदन माग गरिएको उनले बताए । प्रक्रिया पूरा गरेकामध्ये ५५ जना काठ लिन नआएपछि पुन: आवेदन माग गरिएको हो ।
बाँकी रहेका काठ भूकम्पपीडितमा पनि एकल महिला, ज्येष्ठ नागरिक, भूकम्पबाट ज्यान गुमाएकाको परिवार, सीमान्तकृत र अल्पसंख्यक जातजातिका परिवारहरूलाई वितरण गर्ने योजना बनाइएको भट्टले बताए । ‘काठ आइपुग्न ढिला भएकै हो,’ उनले भने, ‘कतिपयले निवेदन दिएर पर्खेनन्, आफ्नै हिसाबले जोहो गरिसकेकाले लिन नआएका हुन सक्छन् ।’
सहुलियतको काठ प्राप्तिका लागि घर निर्माण अनुदानको दोस्रो किस्ता लिएको वा लिनयोग्य भनेर खुलाइएको प्रमाणित इजाजत र तेस्रो किस्ता प्राप्त नगरेको हुनुपर्ने मापदण्ड छ ।
गोरखा नगरपालिका १३, देउरालीस्थित गोरखकाली रबर उद्योग परिसरमा भण्डारण गरिएको काठ असार मसान्तसम्म वितरण गरिसक्ने लक्ष्य समितिको छ । सहुलियतका वितरणका लागि ल्याएको काठलाई ‘ए’, ‘बी’ र ‘सी’ ग्रेडमा वर्गीकरण गरिएको छ ।
‘ए’ ग्रेडको प्रतिक्युबिक फिट ६ सय ३, ‘बी’ को ५ सय ६ र ‘सी’ ग्रेडको काठ ५ सय ४७ मा समितिले वितरण गरिरहेको छ । ‘९० प्रतिशत राजस्व छुटमा भूकम्पपीडितलाई काठ उपलब्ध गराइए पनि कटान मुछान र ढुवानी खर्च भने लैजाने व्यक्ति स्वयंले व्योहोर्नुपर्ने नियम छ,’ सचिव भट्टले भने, ‘एक भूकम्पपीडितलाई बढीमा ३० क्युबिक फिटसम्म काठ उपलब्ध गराइएको हो ।’ २ नगरपालिका पालुङटार र गोरखासँगै सहिद लखन, आरूघाट र बारपाक सुलिकोट गाउँपालिकाका भूकम्पपीडितलाई काठ उपलब्ध गराइएको उनले बताए ।
kantipurdaily
