आगामी चुनावको तयारीका लागि कार्यकर्ता प्रशिक्षण गर्न बुधबार सदरमुकाम आएका उनले भने, ‘माओवादीले अब बन्दुक देखाएर होइन, जनताको मन जितेर क्रान्ति गर्नु पर्छ ।’ प्रशिक्षणमा बोल्दै उनले चुनाव जिते मात्र माओवादीले १० वर्षभित्र फेरि अर्का क्रान्तिको नेतृत्व गर्न सक्ने दाबी गरे । उनले भने, ‘नेता कार्यकर्ताको विचार र बानी बिग्रियो, जनता छाडेर ठेकेदारको पछि लागेर चुनाव जितिँदैन रहेछ ।’

पहिलो संविधान सभामा पहिलो पार्टी भएको माओवादी फुटका कारण अहिले कमजोर बन्दै गएको उनको तर्क थियो । ‘कांग्रेस, एमालेले कुहिएको पिठो बेचेर चुनाव जितेका छन्, हामीले बास्मती धान फलाए पनि चामल बनाएर बेच्न जानेनौं’, उनले भने । देश माओवादीको एजेण्डामा अघि बढे पनि नेतृत्व गर्नबाट आफूहरु चुकेको उनको भनाइ थियो ।

जनतासँग दुरी बढ्दै गएका कारण चुनावमा हार बेर्होनु परेको उनले बताए । ‘जनयुद्धका बेला जनतासँगै खान्थ्यौं, बस्थ्यौं, अहिले हाम्रो उठबस ठेकेदारसँग बढेको छ, जनयुद्धको बेलाको जस्तो ‘पिओर’ माओवादी भेटिनै छाड्यो ।’ केन्द्रीय नेतादेखि कार्यकर्तासम्म शान्ति प्रक्रियामा आएपछि बिग्रेको उनले बताए । ‘पैसा, मसल र षड्यन्त्रले चुनाव जितिदैन’, उनले भने, ‘जनतासँग सम्बन्ध बढाएर संगठन बनाएपछि मात्रै चुनाव जितिने रहेछ ।’

चुनाव जित्न सके शान्ति प्रक्रियाबाटै नेपालमा समाजवादी क्रान्ति गर्न सकिने उनले बताए । ‘काठमाडौं कब्जा गर्ने रहर मलाई पुगेको छैन’, भावुक हुँदै उनले भने, ‘६३ वर्षको हुँदा पनि जोश आइरहेको छ ।’ माओवादीको अन्तिम लक्ष्य जनवादी क्रान्ति भएको उनले बताए । ‘हाम्रो लागि शान्ति प्रक्रिया र चुनाव बिसौनी र भर्‍याङ मात्र हो, म जिउँदै हुँदा लक्ष्यमा पुगेर मर्ने चाहना छ ।’ परिवर्तनको स्वामित्व माओवादीले लिन नसकेको दाहालले बताए ।

प्रशिक्षणको अधिकांश समय चुनाव लक्षित भाषण गरेका दाहालले जनताले माओवादीलाई भोट दिए पनि परिणाम ल्याउन नसकेको बताए । ‘जनतासम्म पुगेर फेरि संगठन बलियो बनाउन सक्यौं भने सजिलै माओवादी पहिलो पार्टी हुन्छ’, दाहालले भने । पार्टी बचाउन व्यक्तिगत स्वार्थ त्याग्न उनले कार्यकर्तालाई आग्रह गरेका थिए । ‘हिजो जनयुद्धमा मार्न, मर्न तयार भएका कमरेडहरु अहिले मन्त्री, सांसद हुन नपाउँदा अनुहार नै हँसिलो हुँदैन’, उनले भने, ‘पार्टीगत स्वार्थभन्दा व्यक्तिगत स्वार्थ हाबी हुँदा माओवादी बिग्रियो ।’

कार्यकर्ता प्रशिक्षण गर्न माओवादी नेताहरु नारायणकाजी श्रेष्ठ, रामबहादुर थापा, देव गुरुङ जिल्ला आएका थिए ।