गोरखा समाचारदाता
भाद्र ३० गते । आँबुखैरेनी कप फुटबल प्रतियोगिता २०७४ सुरु भएको छ । आँबुखैरेनी गाउँपालिका वडा नं. ३ को अल स्टार क्लबको आयोजनामा प्रतियोगिता सुरु भएको हो । लामो समय देखि आँबुखैरेनीमा स्थानीय स्तरमा फुटबल प्रतियोगिता नभएकाले बिजयादशमीको पूर्व संन्ध्यामा आँबुखैरेनी कप फुटबल आयोजना गरिएको काक्लबका उपाध्यक्ष सुशिल पाण्डेले बताए ।
गोरखकाली रबर उद्योगको खेल मैदानमा भएको प्रतियोगितामा १६ टिमको सहभागीता छ । प्रतियोगिता उद्घाटन खेलमा हरमटारी युवा क्लब गोरखाले बिजयी सुरुवात गरेको छ । पूलजीप युवा क्लबलाई १ का बिरुद्ध ३ गोल गर्दै हरमटारी युवा क्लब गोरखाले बिजयी सुरुवात गरेको क्लबका सचिव सुमन श्रेष्ठले जानकारी दिए । प्रतियोगिता अन्तर्गत शुक्रबार ३ खेल हुने भएको छ ।
फुटबल प्रतियोगिता अन्तर्गत शुक्रबारको पहिलो खेल बिहान ८ बजे आँबुखैरेनी युथ क्लब र मस्र्याङ्गदी मनकामना युथ क्लबबीच प्रतिस्पर्धा हुनेछ । त्यस्तै, शुक्रबारको दोस्रो खेल दिउँसो २ बजे कृष्ण दल गण ढकालटार र कुरिनटार युथ क्लबबीच भिडन्त हुने र शुक्रबारको अन्तिम तथा तेस्रो खेल अपराह्न ४ बजे बरादी युथ क्लब बरादी र छेरेत युथ क्लब मझुवाबीच आमने सामने हुने आयोजक अल स्टार क्लब आँबुखैरेनीले जनाएको छ ।
आगामी असोज ७ गते सम्म चल्ने आँबुखैरेनी कप फुटबल प्रतियोगिताको बिजेताले नगद १ लाख २० हजार रुपैंया र उपबिजेताले नगद ५० हजार रुपैंया प्राप्त गर्नेछ । क्लबका अध्यक्ष बिष्णु श्रेष्ठको अध्यक्षतामा भएको एक कार्यक्रमका विच इलाका प्रहरी कार्यालय आँबुखैरेनीका प्रहरी निरीक्षक लोक बहादुर गुरुङ्ले प्रतियोगिताको उद्घाटन गरेका हुन् ।
