माघ ९, २०७३- आफ्नो प्रस्तुति लिएर अष्ट्रेलिया आएका सीताराम कट्टेल ‘धुर्मुस’ र कुञ्जना घिमिरे ‘सुन्तली’ले अष्ट्रेलियाका नेपालीहरुलाई भरपुर मनोरञ्जन दिए । उनीहरुले आफ्नो फाउण्डेसनमार्फत निर्माण गरिरहेको नमुना बस्तीका लागि मञ्चबाटै १६ हजार डलर बढी रकम समेत संकलन गरे ।

सिड्नीमा रहेको गजबको इभेन्टस् र धुर्मुस सुन्तली फाउण्डेसनद्वारा नमुना बस्ती निर्माणमा सहयोग पुर्‍याउन रकम संकलन गर्ने उद्देश्यका साथ सांगीतिक साँझको आयोजना गरिएको थियो । विभिन्न सांगीतिक कार्यक्रम, नृत्यहरुका साथमा नेपालबाट आएका गायक भरत सिटौलाको प्रस्तुति समेत राखिएको थियो भने धुर्मुस-सुन्तलीले आफ्नो प्रहसन समेत प्रस्तुत गरेका थिए । मुख्य गरेर नेपाली राजनीतिलाई ब्यङ्य गरिएको उनीहरुको प्रहसनले नेताहरुलाई सुध्रन सुझाव दिएको थियो ।

कार्यक्रममा भरत सिटौलाले आधा दर्जन बढी गीतहरु प्रस्तुत गरेका थिए भने अष्ट्रेलियाका गायक, गायिकाहरु समीर आचार्य, सञ्जीव पराजुली, मोक्षदा सिलवाल, सुजन पोखरेल, प्रदीप चापागाईंले समेत गीत सुनाएका थिए । कान्तिपुर टेलिभिजनका कार्यक्रम प्रस्तोता प्रदीप निरौलाले सञ्चालन गरेको कार्यक्रमको आकर्षणको रुपमा अष्ट्रेलियामा रहेर नेपाली गीत, संगीतलाई नौलो ढंगले नृत्यमा पस्कँदै आएको द नेक्स्टको प्रस्तुति पनि थियो । सिड्नीको हर्स्टभिलमा रहेका मराना अडिटोरियममा भएको कार्यक्रममा ७ सय बढी दर्शकहरुले सहभागिता जनाएको आयोजक संस्थाका प्रदीप चापागाईंले जानकारी दिए ।

धुर्मुस-सुन्तलीले आफूहरुले मुसहर बस्तीमा निर्माण सुरु गरेको घरहरु यही नयाँ वर्षमा हस्तान्तरण गर्ने तयारी रहेको जानकारी दिएका थिए । यसैगरी उनीहरुले ४० वटा घरको जग राखिसकेका कारण आफूहरुले सोचेको समयमा घर हस्तान्तरण गर्न सक्ने विश्वास व्यक्त गरे । उनीहरुले देश विदेशबाट आफूहरुले पाएको सहयोगका लागि सबैलाई धन्यवाद समेत दिएका थिए ।

कार्यक्रममा १ हजार डलर बढी सहयोग दिन चाहनेहरुलाई आयोजकले मञ्चमै आएर रकम हस्तान्तरण गर्ने व्यवस्था मिलाइदिएको थियो । जसअनुसार मञ्चबाट मात्रै १६ हजार बढी रकम संकलन गरिएको थियो भने अहिलेसम्म जम्मा १७ लाख ४२ हजार ६ सय २५ रुपैयाँ संकलन गरिसकिएको आयोजकले जानकारी दिएको छ । उनीहरुलाई सिड्नीका वाणिज्यदूत दीपक खड्काले ५ हजार डलर र कोग्राहमा रहेको बोइज युनाईटेड ग्रुपले ३ हजार ६ सय ७ डलर सहयोग गरेको थियो ।

आफ्नो तीन साता लामो सांगीतिक कार्यक्रमका लागि उनीहरु अहिले अष्ट्रेलियाका विभिन्न शहरहरुमा छन् । उनीहरुको कार्यक्रम मेलबर्न, ब्रिसबन, एडिलेड लगायतका शहरहरुमा समेत आयोजजना हुँदैछ ।