पुस १२, २०७३- विवादपछि सातौं राष्ट्रिय खेलकुदको महिला क्रिकेटको स्वर्ण पदक पूर्वाञ्चललाई प्रदान गरिएको छ । खेलको दोस्रो अन्तिम ओभरमा चौका भए/नभएको विवाद आएपछि फाइनलमा नेपाल एपीएफले खेल बीचैमा बहिस्कार गरेपछि पूर्वाञ्चल च्याम्पियन भएको हो ।

टस जितेको पूर्वाञ्चल १८.४ ओभरमा ६३ रनमा अलआउट भएको थियो । डीभिएम स्कुलमा जवाफमा आएको डिफेन्डिङ च्याम्पियन एपीएफले ८ विकेट गुमाइसकेको थियो । १८.४ ओभरमा एपीएफकी ब्याट्सवुमन रितु कनोजियाले गरेको प्रहारमा विवाद आएपछि खेल रोकिन पुगेको थियो ।

एपीएफले त्यो बलले सीमा रेखा पार गरेको भन्दै चौका दिनु पर्ने अडान राखेको थियो । तर अन फिल्ड अम्पायरले पूर्वाञ्चलका फिल्डर अप्सरी बेगमलाई क्रिकेटको नियमानुसार बाउन्ड्रीको बारेमा सोधेका थिए । फिल्डरले चौका नभएको भनेपछि अम्पायर त्यही निर्णयमा अडिग रहे । तर चौका नदिएपछि एपीएफका खेलाडीहरु मैदान भित्र पस्न मानेनन् ।

‘हामीले एपीएफलाई २७ मिनेटको समय दियौं, त्यसपछि पनि उनीहरु खेल्न माननेन् । एपीएफका कप्तान र व्यवस्थापकलाई थप ५ मिनेट दिएर खेल्न विशेष अनुरोध गर्दा पनि नमानेपछि हामीले एपीएफलाई वाक आउट गरी पूर्वाञ्चललाई विजेता घोषणा गरेका हौं,’ म्याच रेफ्री सत्यजीत सरकारले भने ।