प्रधानमन्त्री प्रचण्डको आह्वानमा बसेको प्रमुख तीन दलका शीर्ष नेताको बैठक । तस्वीर: प्रधानमन्त्रीको सचिवालय
२८ मंसिर, काठमाडौं । प्रधानमन्त्री प्रचण्डले नेपाली कांग्रेसका सभापति शेरबहादुर देउवा र एमाले अध्यक्ष केपी ओलीलाई मंगलबार बिहान बालुवाटारमा बोलाएका छन् ।
सरकारले संसदमा दर्ता गरेको संविधान संशोधन प्रस्तावपछि उत्पन्न राजनीतिक गत्यावरोध हल गर्नका लागि प्रधानमन्त्रीले केपी ओली र शेरबहादुर देउवालाई बोलाएका हुन् ।
प्रधानमन्त्री निवास बालुवाटारमा तीन नेतावीच प्याकेजमै छलफल हुने र अहिलेको राजनीतिक गत्यावरोधको समाधान खोज्ने प्रधानमन्त्रीको योजनाअनुरुप तीन शीर्ष नेताको बैठक बोलाइएको स्रोतले बतायो ।
तीन नेताको भेटमा संविधान संशोधन प्रस्ताव, संसदको अवरोध खुलाउने विषय, लोकमानसिंह कार्कीमाथिको महाअभियोग प्रस्ताव र आगामी स्थानीय तहको चुनाव लगायतका विषयमा एकीकृत रुपमा छलफल हुने बताइएको छ ।
दलका नेताहरुवीच एजेण्डामा मतभेद देखिए पनि भित्री रुपमा पावर सेयरिङको विषय बन्ने गरेकाले प्रधानमन्त्री प्रचण्डले एमाले अध्यक्ष केपी ओलीसँग पावर सेयरिङका विषयमा समेत खुलस्त कुरा गर्न चाहेको स्रोतले बतायो । स्रोतले भन्यो- ‘समस्याको समाधान खोज्नका लागि एमालेसँग प्याकेजमै कुरा हुन्छ ।’
यसअघि कांग्रेस सभापति शेरबहादुर देउवाले एमाले अध्यक्ष केपी ओलीसँग आइतबार छलफल गरेका थिए । सो छलफलमा स्थानीय निर्वाचनबारे कुराकानी भएको थियो । त्यसको भोलिपल्ट सोमबार प्रधानमन्त्री प्रचण्ड र देउवावीच आपसी छलफल भएपछि ओलीसहित तीन नेतावीच कुराकानी गर्ने कार्यक्रम तय भएको हो ।
देउवा र प्रचण्डवीच सम्वाद भइसकेपछि सोमबार साँझ प्रचण्ड र ओलीवीच टेलिफोन सम्वाद भएको थियो । सो सम्वादमा प्रचण्डले ‘अब त तपाईको रीस मर्यो कि ?’ भन्दै ‘आउनुहोस्, बालुवाटारमा बसेर छलफल गरौं र समस्याको समाधान खोजौं’ भन्दै केपी ओलीलाई बोलाएका हुन् ।
प्रचण्डले बिहान साढे ९ बजे नै बालुवाटार बोलाए पनि ओली करिब डेढघटा पछिमात्रै पुगेका थिए । देउवा भने साढे ९ बजे नै बालुवाटार पुगेर ओलीलाई पर्खिइरहेका थिए । बाटोमा जाम भएकाले ओली ढीलो पुगेका हुन् ।
अहिले प्रधानमन्त्री निवासमा तीन नेतावीच छलफल जारी छ ।
onlinekhabar