कार्तिक २५, २०७३- राराको प्राकृतिक सुन्दरता देखेर पोखराकी मुना बाँस्तोला चकित परिन् । उनी पहिलो पटक रारा घुम्न आएकी हुन् । पोखराबाट तीन दिन गाडीको यात्रामा रारा पुगेकी उनले यहाँको प्राकृतिक सुन्दरतामा मोहित भएको बताइन् । स्याङजाका नेत्र खाँडले पनि राराको प्राकृतिक सुन्दरता देखेर हर्षित भएको सुनाए । उनीहरू मात्र होइन, लामो यात्राबाट रारा भ्रमणमा आउने पर्यटकहरू झनै रमाउने गरेका छन् । वैशाखदेखि रारामा विदेशीभन्दा आन्तरिक पर्यटकको भीड लाग्न थालेको छ । रारा क्षेत्र वरपरका होटल भरिभराउ छन् । होटलमा नअटेकाहरू खुला चौरमा टेन्ट टाँगेरसमेत बस्ने गरेका छन् ।

साउनयता ७८ जना विदेशी र करिब ७ हजारभन्दा बढी आन्तरिक पर्यटक यहाँ घुम्न पुगेका रारा राष्ट्रिय निकुञ्जले जनाएको छ । आन्तरिक पर्यटक कर्णाली राजमार्ग र हवाई मार्गबाट यहाँ आउने गरेका छन् । रारा घुम्नेमा सबैभन्दा बढी पोखरेलीको चाप छ । पोखराका व्यवसायी, उद्योगपति, कर्मचारी गाडी बुकिङ गरी धमाधम आउन थालेका छन् । त्यस्तै, काठमाडौं, बुटवल, भैरहवा, स्याङजा, लुम्बिनी, चितवन, पाल्पा, विराटनगरलगायत स्थानबाट गाडी र मोटरसाइकलमा आउने त्यत्तिकै छन् ।

पिना गाविसको झयारी चौरमा गाडी र मोटरसाइकल पार्किङ गरेर त्यहाँबाट हिँडेर आन्तरिक पर्यटकलाई रारा पुग्ने व्यवस्था मिलाइएको छ । निकुञ्जभित्र गाडी र मोटरसाइकल लैजान निषेध गरिएको छ । ‘रारा साँच्चै स्वर्गको अप्सरा जस्तै रहेछ,’ मुनाले भनिन्, ‘यहाँ पुगेपछि साह्रै आनन्द आयो, भोक तिर्खा मेटियो ।’ राराको सबैभन्दा आकर्षणको रूपमा नीलो ताल र वरिपरिको कोणधारी जंगल हो । घुम्न आएका आन्तरिक पर्यटकहरू बिहान तालमा बोटिङ गर्ने, दिउँसो ताल वरपर घुम्ने, तीन घण्टा उकालो चढेर मुर्माटप पुगी छायानाथ सैपाल हिमालको अवलोकन गरी फर्किने गर्छन् । विदेशीभन्दा आन्तरिक पर्यटकको चापले गर्दा बास र खानपिनको व्यवस्था मिलाउन हम्मे परेको भिलेज हेरिटेज होटलका म्यानेजर दीपक रावतले बताए । जति सक्दो राम्रो सुविधा दिएर पठाउने गरेको उनको भनाइ छ ।

आन्तरिक पर्यटकले तीन दिन र बाह्य पर्यटकले चार दिनको प्याकेज लिएर रारा आउने गरेका छन् । रारामा आन्तरिक पर्यटकको घुइँचो देखेर मुर्मा गाउँका स्थानीय उत्साहित भएका छन् । घुम्न आउने पर्यटकहरूलाई तालमा बोटिङ गराउन मुर्मा गाउँको राजाकोट उपभोक्ता समितिले दुई वटा रबरका डुंगा सञ्चालन गरेको छ ।

वैशाखदेखि कात्तिक १५ सम्म डुंगाबाट करिब साढे ५ लाख रुपैयाँ आम्दानी भएको समितिका सचिव धनसिंह रोकायाले बताए । पर्यटकलाई मनोरञ्जनका लागि स्थानीयले घोडाको व्यवस्था पनि गरेका छन् । घोडा चढेर ताल परिपरि घुम्न पाउँदा आन्तरिक पर्यटक खुसी देखिन्छन् । पर्यटकका लागि रारामा एक दर्जन घोडा चालु छन् । राराको हुटुमा सञ्चालित दुई वटा ठूला होटल डाँफे र भिलेज हेरिटेज सञ्चालनमा छन् । हेरिटेजले पर्यटकहरूलाई रातो चामलको भातसहित स्थानीय परिकारको खाना नास्ताको व्यवस्था मिलाएको छ ।

पर्यटकलाई लक्षित गरी रारामा ३ वटा मोबाइल टावर स्थापना गर्न लागिएको नेपाल टेलिकमका प्राविधिक कृष्ण कोइरालाले बताए । आन्तरिक पर्यटकबाट होटल, घोडा व्यवसायी र डुंगा चालकको आम्दानी वृद्धि भएको छ । निकुञ्जले भने आन्तरिक पर्यटकबाट शुल्क उठाउने गरेको छैन । विदेशी पर्यटकबाट प्रवेश शुल्क उठाइने निकुञ्जका अधिकृत मोहनचन्द विश्वकर्माले जानकारी दिए । पर्यटक बढेपछि तालभन्दा एक घण्टाको पैदलमा पुगिने मुर्मा गाउँका स्थानीयको मह, सिमी, फापर, कुखुरा, खसीलगायतको कृषिजन्य सामग्री बिक्री बढ्दै गएको छ । पर्यटकदेखि होटल सञ्चालक गाउँमा पुगेर स्थानीय परिकारको खोजी गर्न थालेको मुर्मा गाउँका नरवीर रोकायाले बताए ।