क्यान्सरपीडित बालबालिकाको उपचारमा सघाउन पोखरादेखि काठमाडौंसम्म दौडन लागेका अस्ट्रेलियन अल्ट्राधावक टिम ब्लेयर (बीचमा) ।
कृष्णमणि बराल
पोखराः आफूलाई लागेको क्यान्सरको उपचारका क्रममा दौडन सुरु गरेका अस्ट्रेलियाका टिम ब्लेयर बुधबार पोखराबाट काठमाडौंको दौड सुरु गर्दैछन्, क्यान्सरपीडित बालबालिकाको उपचारमा सघाउन ।
सुरुवाती चरणमै क्यान्सरको उपचार गरेर बाँचेपछि उनले आफ्नो पुरानो पेसा इन्जिनियरिङ चटक्कै छाडिदिए र सुरु गरे समाजसेवा । आफू भयानक रोग लाग्दा सुरुमै उपचार गराएर बाँचेको र सोही रोगले आफ्नै छोरीकी साथीले ज्यान गुमाएको थाहा पाएपछि उनी क्यान्सरपीडितका लागि उपचार र सहयोग रकम जुटाउन लागिपरेका छन् ।
बुधबारदेखि चार दिन लगाएर जब उनी पोखराबाट काठमाडौंसम्म दौडनेछन्, अस्ट्रेलियामा शुभेच्छुकहरूले रकम दिएर सहयोग गर्नेछन् । ‘म दौडँदा दाताहरूले सहयोग गर्नेछन्,’ ४७ वर्षीय ब्लेयरले मंगलबार पोखरामा पत्रकारसँग भने ।
क्यान्सर लागेको थाहा पाएपछि शरीर तन्दुरुस्त राख्न उनले व्यक्तिगत रूपमै दौडन थालेका थिए । ‘त्यसरी दौडँदा मेरो स्वास्थ्यमा फाइदा पुगेको थियो’, उनले प्रस्ट्याए । दौडेरै छारेरोगबाट पनि मुक्ति पाएको उनले बताए । ब्लेयरलाई सन् २०११ मा छातीको क्यान्सर लागेको थियो ।
क्यान्सरलाई जितेका अस्ट्रेलियन अल्ट्राधावक क्यान्सरपीडित बालबालिकाको उपचारमा सघाउन पोखरादेखि काठमाडौंसम्म दौडदै छन ।
अहिले उनी अस्ट्रेलियाका अल्ट्राधावकका रूपमा दौडिरहेका छन् । नेपाल पर्यटन बोर्डले उनलाई नेपालमा सघाइरहेको छ । उनी नेपालमा दौडिँदा पर्यटन प्रवद्र्धन हुने भएकाले सघाएको बोर्डका पोखराका अधिकृत सूर्य थपलियाले बताए । ‘भूकम्पछि नेपाल घुम्न सुरक्षित छ भन्ने सन्देश विश्वका पर्यटकमाझ प्रवाह गर्न उनको दौड फलदायी हुनेछ’, थपलियाले भने ।
फेवाताल किनार बसुन्धरा पार्कबाट बुधबार दौड सुरु गरी चार दिनमा निर्धारित दुरी दुई सय दस किलोमिटर पूरा गरी काठमाडौं वसन्तपुरमा उनको दौड पूरा हुनेछ । उनका साथमा नेपाली अल्ट्राधावक राज प्रधान र नारायण आचार्य पनि दौडनेछन् ।
डुम्रे, मलेखु र धार्के हुँदै चौथो दिन उनीहरूको टोली काठमाडौं आइपुग्नेछ । अस्ट्रेलियामा जम्मा हुने पैसामध्ये केही ब्लेयरले सोलुखुम्बु जिल्लाको एक विद्यालयलाई दिने भएका छन् ।
सन् १९९० मा पहिलोपटक नेपाल आएका उनले त्यतिबेला भेटेका साथी राजन थापा र उनकी श्रीमती पेमा डोमा शेर्पाको सम्झनामा नेपालमा च्यारिटी दौड गर्ने योजना पहिल्यै बनाएका थिए । राजन र पेमाको निधन भइसकेको छ । पेमा डोमा उत्तरी र दक्षिणी दुवै मोहडाबाट सगरमाथा आरोहण गर्ने पहिलो नेपाली महिला हुन् ।

annapurnapost

लेखकबाट थप:

• लकडाउन नियम उलंघन गरेपछि सेल्टिक र एबरडीनबीचको खेल स्थगित
• पारिवारीक बनमा ठकुरी
• नेपालमै बन्छ विश्वका ७० देशलाई चाहिने आँखाको लेन्स
• सबै वडामा स्वास्थ्य चौकी बनाउने योजना
• टेष्ट वरियतामा कोहली शिर्ष स्थानमा उग्लिए