काठमाडौंः प्रमुख प्रतिपक्षी दल नेकपा एमालेसहित विपक्षमा रहेका दलहरुले सरकारविरुद्ध मोर्चाबन्दीको तयारी थालेका छन्।
सरकारको विपक्षमा मतदान गरेका दलहरुलाई आफ्नो मोर्चामा ल्याउन प्रमुख प्रतिपक्षी दल नेकपा एमालेले प्रयास थालेको छ। प्रयासको थालनी स्वरुप एमालेसहित विपक्षी दलहरुको पहिलो बैठक मंगलबार धुम्बाराहीमा बसेको थियो।
बैठकमा नेकपा एमालेका अध्यक्ष केपी शर्मा ओलीले वर्तमान सरकारले राष्ट्रियतामा आँच आउने खालका काम गर्न सक्ने भन्दै त्यसबारेमा एकताबद्ध भएर लाग्नु पर्ने बताएका थिए। ओलीले संविधान कार्यान्वयन हुन नदिने काम नयाँ सरकारबाट हुन सक्ने बताउँदै एकताबद्ध र चनाखो हुन पनि आवश्यक रहेको बताएका थिए।
एमालेसहित बसेको विपक्षी दलको बेठकले संविधानको कार्यान्वयनका लागि केपी शर्मा ओली नेतृत्वको तत्कालीन सरकारले ल्याएको कार्ययोजना लागू हुनुपर्नेमा जोड दिएको एमाले प्रमुख सचेतक भानुभक्त ढकालले जानकारी दिए। ढकालले विपक्षी दल कसरी एकताबद्ध भएर संसदमा प्रस्तुत हुन सकिन्छ भन्नेबारेमा वैठकमा छलफल भएको बताए।
बैठकमा प्रधानमन्त्रीको निर्वाचनमा वर्तमान प्रधानमन्त्री पुष्पकमल दाहाल प्रचण्डको विपक्षमा मतदान गर्ने एमालेसहित राप्रपा नेपाल, नेमकिपा, नेकपा माले, राष्ट्रिय जनमोर्चा लगायत दलका नेताहरु सहभागी भएका थिए।
विपक्षमा रहेको एमालेपछिको दोस्रो ठूलो दल राप्रपा नेपालका अध्यक्ष कमल थापा भने वैठकमा उपस्थित थिएनन्। राप्रपा नेपालका तर्फबाट दिलनाथ गिरी बैठकमा सहभागी थिए।
annapurnapost
