सुवास गोतामे

काठमाडौं: सरकारले भूकम्पपीडितलाई एक हजार पाँच सय नयाँ ट्याक्सी नम्बर दिने निर्णय गरेपछि गत साउन ५ गतेयता ५० हजार आवेदन परिसकेका छन् । भूकम्प प्रभावित १४ जिल्लाका पीडितलाई ती ट्याक्सी नम्बर वितरण गर्ने सरकारको निर्णयअनुसार आवेदन आह्वान गरिएको हो ।

यातायात व्यवस्था विभागका अनुसार मंगलबारसम्ममा ५० हजारले आवेदन दिएका छन् । आवेदन दर्ता गर्ने म्याद भदौ २ गतेसम्म तोकिएको छ । त्यतिबेलासम्ममा करिब ७० हजार आवदेन पर्ने जानकारी विभागका प्रवक्ता वसन्त अधिकारीले दिए । ट्याक्सी नम्बरका लागि सक्कल नागरिकतासहित सम्बन्धित व्यक्ति आफैं उपस्थित भएर भूकम्पपीडितको प्रमाणित कार्ड र हालसालै खिचिएको फोटोसहित निवेदन दिनुपर्छ ।

प्रवक्ता अधिकारीले प्राप्त हुने आवेदनलाई गोलाप्रथाबाट छनोट गरिने बताए । भूकम्प प्रभावित जिल्ला दोलखा, सिन्धुपाल्चोक, गोरखा, नुवाकोट, काभ्रे, रसुवा, धादिङ, भक्तपुर, काठमाडौं, ललितपुर, मकवानपुर, सिन्धुली, रामेछाप र ओखलढुंगाबाट आवेदन परेका छन् । विभागका अनुसार बुझाइमा गलत भएकाले गाडी नै रिर्जभ गरेर सिन्धुपाल्चोक, गोरखा र रसुवाका भूकम्पपीडित आवेदन दिन आएका थिए । सबैभन्दा बढी आवेदन काठमाडौं, सिन्धुपाल्चोक, गोरखा, काभे्र र धादिङबाट परेका छन् ।

प्रवक्ता अधिकारीका अनुसार सरकारले ट्याक्सी नम्बरमात्रै वितरण गर्ने भन्ने नबुझेर भूकम्पपीडितले ट्याक्सी नै सित्तैंमा पाइने जसरी आवेदन दिएका छन् । उनले भने, ‘सरकारले दर्ता नम्बरमात्रै दिने हो, बाँकी सम्पूर्ण खर्च भूकम्पपीडित आफैंले गर्नुपर्छ ।’ अधिकारीले ट्याक्सी नम्बर पाएपछि भूकम्पपीडितले अर्काका नाममा नामसारी गर्न पाउने छुट रहेको बताए ।

सरकारले गत चैत २१ गते मन्त्रीस्तरको निर्णय गरेर भूकम्प प्रभावित जिल्लाका पीडितलाई एक हजार पाँच सय ट्याक्सी नम्बर वितरण गर्ने निर्णय गरेको थियो । सरकारले यसअघि भने एक हजार आठ सय ५० वटा ट्याक्सी नम्बर वितरण गरेको थियो । जसमा सात सय सर्वसाधारण, ६ सय ५० व्यवसायी र पाँच सय स्वरोजगार (चालक आफैं) लाई वितरण गरिएको थियो ।

विभागका अनुसार उपत्यकामा हाल सात हजार ट्याक्सी छन् । तीमध्ये पाँच हजार ६ सय ५० पुराना र एक हजार ८ सय ५० नयाँ ट्याक्सी छन् । ट्याक्सी व्यवसायी संघ र यातायातसम्बद्ध अन्य व्यवसायीले भने नयाँ ट्याक्सी वितरण नगर्न सरकारको पटकपटक ध्यानाकर्षण गराउँदै आएका थिए ।

annapurnapost