काठमाडौं, साउन २१ – थप मन्त्रीको नाम टुंगो लगाउन नेपाली कांग्रेस र नेकपा माओवादी केन्द्र शुक्रबार पनि आन्तरिक गृहकार्यमा जुटेका छन् । विवादका कारण दुवै दलले मन्त्री हुनेहरुको नाम टुंगो लगाउन सकेका छैनन् ।
बिहीबार कांग्रेसबाट दुई र माओवादीबाट तीनजना मन्त्रीले मात्र शपथ लिएका छन् । कांग्रेसले १३ र माओवादीले ८ मन्त्रालय बाँडफाँड गर्ने सहमति भएको छ । कांग्रेसबाट विमलेन्द्र निधी उपप्रधान सहित गृहमन्त्री र रमेश लेखक भौतिक पूर्वाधार तथा यातायात मन्त्री बन्नुभएको छ ।
यस्तै नेकपा माओवादी केन्द्रबाट कृष्णबहादुर महरा उपप्रधान तथा अर्थमन्त्री, गौरीशंकर थारु कृषी विकासमन्त्री र दलजीत श्रीपाइली युवा तथा खेलकुद मन्त्री बन्नुभएको छ । कांग्रेसले रक्षा, परराष्ट्र, सिंचाई, संस्कृति पर्यटन तथा नागरिक उड्डयन, खानेपानी तथा सरसफाई, शान्ति तथा पुनर्निर्माण, सामान्य प्रशासन, वन, सहरी विकास र जनसंख्या तथा वातावरण मन्त्री बन्नेहरुको नाम टुंगो लगाउन बाँकी छ । शेखर कोइराला र अर्जुननरसिंह केसीले रोजे अनुसारको मन्त्रालय नपाएपछि मन्त्री बन्न अस्वीकार गर्नुभएको छ ।
कोइरालाले रोजे अनुसारको मन्त्रालय र केसीले गृह मन्त्रालय पाए मात्र मन्त्री बन्ने अडान राख्नुभएको छ । यस्तै रामचन्द्र पौडेल पक्षधरले कम्तीमा ५ मन्त्रालय पाउनुपर्ने दाबी गरेको छ । विवाद नमिलेकाले कांग्रेसले मन्त्री बन्ने थप नेताहरुको नाम टुंगो लगाउन सकेको छैन ।
माओवादीले आफ्नो भागमा परेको उर्जा, स्थानीय विकास, शिक्षा, सूचना तथा सञ्चार र कानुन, न्याय तथा संसदीय मामिला मन्त्रालयको जिम्मेवारी सम्हाल्ने नेताको नाम टुंगो लगाउन बाँकी छ । सूचना तथा सञ्चार मन्त्रीमा अर्कोले जिम्मेवारी नसम्हालेसम्म उपप्रधानमन्त्री महरालाई सरकारको प्रवक्ताको जिम्मेवारी दिइएको छ ।
माओवादी जनार्दन शर्मा, राम कार्की, हितराज पाण्डे, प्रभु शाह, शिवकुमार मण्डल, सीता नेपाली, डिआर पौडेललगायत नेताहरु मन्त्रीका आकांक्षी छन् ।
ujyaaloonline