काठमाडौँ, २९ असार– नेपाली काँग्रेसका सभापति शेरबहादुर देउवाले प्रधानमन्त्री केपी शर्मा ओलीको राजीनामा पर्खिरहेको बताएका छन्। सरकार अल्पमतमा परेको हुँदा प्रधानमन्त्री ओलीले राजीनामा दिनुपर्ने उनको भनाई छ। ‘हामीले प्रधानमन्त्रीको राजीनामा पर्खिरहेका छौं’, उनले भने’उहाँले राजीनामा दिनुपर्छ।’

माओवादी केन्द्रले सरकारलाई दिएको समर्थन फिर्ता लिएपछि कांग्रेस संसदीय दल तथा काठमाडौँमा उपलब्ध केन्द्रीय सदस्यसहितको बैठक बसेको थियो।
नयाँ बानेश्वरस्थित संसदभवनमा पार्टीको बैठक वसेको थियो। बैठक पछि  प्रमुख प्रतिपक्षी दलका नेतासमेत रहेका सभापति देउवाले एमाले त तपार्इंलाई प्रम पदमा प्रस्ताव एवम् समर्थन गर्दैछ हो ? भन्ने जिज्ञासामा सो प्रस्ताव ढिलो भयो भन्ने जवाफ दिए।

उनले संविधान कार्यान्वनका लागि दलहरुका बीचमा सहमति र सहकार्य आवश्यक भएकामा जोड दिए।  दोस्रो संविधानसभाको निर्वाचनमा नेका सदनमा पहिलो पार्टीका निर्वाचित भएको थियो। सदनमा उसको २०७ सिट छ ।

सत्ता साझेदार नेकपा(माओवादी केन्द्र)ले मङ्गलबार सरकारबाट बाहिरिने निर्णय गरेसँगै माओवादी केन्द्रका अध्यक्ष पुष्पकमल दाहालको नेतृत्वमा नयाँ सरकार गठन गर्न नेका र केन्द्रका बीचमा सहमति भएको छ। माओवादीले सरकारबाट समर्थन फिर्ता लिएपछि ओली नेतृत्वको सरकार अल्पमतमा परेको छ। माओवादी र एमालेका बीचमा भएका नौबुँदे र तीनबुँदै भद्र सहमतिलाई प्रम ओलीले कार्यान्वयन नगरे पछि समर्थन फिर्ता लिएको माओवादीले जनाएको

माओवादीले अविश्वासको प्रस्ताव दर्ता गर्ने

यता माओवादी केन्द्रले अविश्वासको प्रस्ताव दर्ता गर्ने तयारी गरेको छ। केन्द्रका नेता गिरिराजमणि पोखरेलले आफ्नो दलले व्यवस्थापिका–संसद्को आजको बैठक सुरु हुनुअगावै वर्तमान सरकार विरुद्ध अविश्वासको प्रस्ताव संसद् सचिवालयमा दर्ता गराउने बताए।

केन्द्रको नयाँ बानेश्वरस्थित संसद्भवनमा बिहान बसेको संसदीय दलको बैठकपछि उनले अविश्वासको प्रस्ताव दर्ता गराएपछि सरकारको बजेट पारित गराउन भने आफ्नो पार्टीले अवरोध नगर्ने बताए।

केन्द्रको पदाधिकारी बैठकले पनि तत्काल प्रम ओलीलाई पदबाट राजीनामा दिन माग गरेको थियो । व्यवस्थापिका–संसद्को बैठक ३ बजे बस्नेछ ।

अब बन्ने नयाँ सरकारको नेतृत्व पार्टी अध्यक्ष पुष्पकमल दाहालले गर्ने र यसका लागि नेकाले सहयोग गर्ने उनले बताए।