असार २८, २०७३- माओवादी केन्द्रका नेता कृष्णबहादुर महराले अध्यक्ष पुष्पकमल दाहालको नेतृत्वमा नयाँ सरकार गठनको लागि कांग्रेसले सहमति जनाइसकेको दाबी गरेका छन् ।

केन्द्रले सरकारलाई दिएको समर्थन फिर्ता लिने निर्णय जानकारी गराउन माओवादी केन्द्र संसदीय दल सिंहदरबारमा आयोजित पत्रकार सम्मेलनमा बोल्दै महराले यस्तो दाबी गरेका हुन् ।

‘संविधान कार्यान्वयनको लागि पहिलो चरणमा माओवादीले सरकारको नेतृत्व गर्ने सहमति भएको छ’, महराले भने,‘दोस्रो चरणमा कांग्रेसले नेतृत्व गर्नेछ ।’

महराले कांग्रेस र माओवादी केन्द्रका बीच सरकार गठनको बिषयमा भएको सहमति भोलिसम्म सार्वजनिक भइसक्ने बताए ।

‘हामी अहिले पनि राष्ट्रिय सहमतिको सरकारको पक्षमा दृढ छौं’, महराले भने,‘हामीले समर्थन फिर्ता लिएपछि अहिलेको सरकार स्वत अल्पमतमा परेको छ ।’

उनले माओवादी केन्द्र अध्यक्ष दाहाल र प्रधानमन्त्री केपी शर्मा ओलीबीच हिजो राति छलफल भएको जानकारी दिंदै छलफलका क्रममा प्रधानमन्त्री ओली राष्ट्रिय सहमतीय सरकारको पक्षमा नदेखिएकाले सरकारलाई समर्थन फिर्ता लिएको प्रष्ट पारे ।

उनले प्रधानमन्त्री ओलीले नै राष्ट्रिय सहमतीय सरकारको नेतृत्व गरुन भन्ने आफ्नो पार्टीको धारणा रहे पनि ओली यसको लागि तयार नदेखिएको आरोप लगाए ।

पत्रकार सम्मेलनको सुरुवामा माओवादी केन्द्रकी प्रवक्ता पम्फा भुषालले सरकारलाई दिएको समर्थन फिर्ता लिने पार्टीको निर्णय जानकारी गराएकी थिइन ।