असार २८, २०७३- सत्ता साझेदार माओवादी केन्द्रले सरकारबाट फिर्ता भएको जानकारी गराएपछि प्रमुख प्रतिपक्षी नेपाली कांग्रेस नयाँ समिकरणको तयारीमा जुट्ना थालेको छ । कांग्रेसले पहिले सरकारबाट फिर्ता हुन भनेपछि माओवादी केन्द्रले मंगलबार त्यसै अनुरुपको निर्णय गरेको हो ।

एमाओवादी केन्द्रले सरकारबाट फिर्ता हुने निर्णय गरे लगतै कांग्रेस सभापति शेरबहादुर देउवाले पदाधिकारीको आकस्मिक बैठक बोलाएका छन् । काँग्रेसका एक नेताका अनुसार पदाधिकारी बैठक पछि केन्द्रिय समितिको बैठक बोलाएर माओवादीलाई समर्थन दिने निर्णय गर्नेछ ।

दुई दलबीचको सत्ता साझेदारीको समझदारी भने सोमबार नै भएको बताइएको छ । अघिल्लो पटक माओवादी केन्द्रले धोका दिएकोले उक्त समझदारी सार्वजनिक नगरी माओवादीलाई सरकारबाट फिर्ता हुन भनेको थियो ।

समझदारीमा भने यसअघि गत बैशाख २३ गते दुई दलबीच भएको सात बुँदे समझदारीलाई नै सामान्य परिमार्जन गरिएको ति नेताले बताए । उक्त समझदारीमा माओवादी अध्यक्ष दाहालको नेतृत्वको सरकारलाई नौ महिनाको समय दिने र त्यस अवधीमा स्थानीय निकायको निर्वाचन गर्ने उल्लेख रहेको छ । त्यसपछि काँग्रेस सभापति देउवाको नेतृत्वमा सरकार बनाउने र त्यसले प्रदेश सभा तथा संघीय संसदको चुनाव गराउने भन्ने समझदारी भएको पनि बताइएको छ ।

सोमबार समझदारी गर्नका लागि माओवादकिा बर्षमान पुन र कृष्णबहादुर महरा थिएभने काँग्रेसका तर्फबाट विमलेन्द्र निधि, रमेश लेखक र अमरेश नारायण सिं थिए । यसअघिको समझदारी पनि यिनै दोस्रो तहका नेताहरुले गरेका थिए ।