असार २१, २०७३- गोरखाको केरौंजा–३ मा पहिरोमा पुरिएर तीन जनाको मृत्यु भएको छ । बाटो मर्मत गर्न गएकामध्ये ६ जना पहिरोमा पुरिएकामा केरौजा–४ का १५ वर्षीय सन्दीप घले, ३० वर्षीया चीनमाया गुरुङ र ४५ वर्षीया कान्छीमाया गुरुङको मृत्यु भएको हो ।

उनीहरू मंगलबार बिहान ११ बजे केरौंजाको फलिङपु भन्ने ठाउँमा खसेको पहिरोमा पुरिएका हुन् । प्रहरी नायब उपरीक्षक वीरेन्द्र थापाका अनुसार घाइते हुनेमा केरौंजा–४ का ४० वर्षीय पुंगे गुरुङ, उकाल गुरुङ र १२ वर्षीय सुकराम घले छन् । घलेको अवस्था गम्भीर छ । माछीखोला प्रहरी चौकीका प्रहरी र स्थानीयवासीले घाइतेको उद्धारसँगै मृतकका शव बाहिर निकालेका हुन् । माछीखोला स्वास्थ्य चौकीमा प्राथमिक उपचार गरिएका घाइतेलाई थप उपचारका लागि काठमाडौं पठाइएको छ ।

घटनास्थलमा उद्धारका लागि काठमाडौंबाट नेपाली सेनाको हेलिकप्टर गएको थियो । प्रमुख जिल्ला अधिकारी नारायणप्रसाद भट्टले घटनाबारे गृह मन्त्रालयमा जानकारी गराएर हेलिकप्टर मागिएको बताए । पहिरोले बिगारेको गुम्दाको माछीखोलाबाट केरौंजा जोड्ने बाटो बनाउन १० जना गएका थिए । तीमध्ये ६ जना पहिरोमा परेका हुन् । सँगै गएका अन्य चार जनाले भने भागेर ज्यान जोगाएका छन् ।

अघिल्लो साता आएको पहिरोबाट केरौंजाका अधिकांश बासिन्दा विस्थापित भएका छन् । २०७२ वैशाख १२ को भूकम्पलगत्तै उक्त ठाउँमा पहिरो गएको थियो । केरौंजा गाउँबाट सुरु भएको करिब पाँच किलोमिटर लामो पहिरो केरौंजाबेसी हुँदै बुढीगण्डकी नदीमा मिसिएको छ । वर्षात् सुरु भएसँगै पुन: पहिरो खस्न थालेको हो । पहिरोबाट विस्थापित बासिन्दा जंगलको बुट्यान फडानी गरेर अस्थायी रूपमा बस्दै आएका छन् । एउटै पहिरोले केरौंजाको गाउँदेखि बेसीसम्मका बस्ती बगाएको स्थानीय सुकबहादुर गुरुङले बताए । उक्त पहिरोका कारण करिब पाँच सय २१ घरपरिवार प्रभावित भएका छन् । भूकम्पलगत्तै पनि पहिरोका कारण करिब दुई सय ५० घरपरिवार विस्थापित भएका थिए । वर्षात्सँगै पहिरो खस्न थालेपछि स्थानीय थातथलो छाडेर सुरक्षित स्थलमा अस्थायी बसोबास गर्न थालेका छन् । ‘जताततै पहिरो खस्न थालेको छ, जतिबेला पनि ढुंगा खसिरहन्छ,’ केरौंजा–३ का यदमा घलेले भनिन् । बस्तीभित्र हिँडडुल गर्दा पनि पहिरो छल्दै होसियार हुनुपर्ने अवस्था रहेको उनले बताइन् ।