एसएसपी थापा भन्छन्- गुन्डाराज अन्त्य गर्न गोली पनि चल्न सक्छ
प्रकाश ढुंगाना
विहीबार राति ८ बजेतिर राजीव गुरुङ उर्फ दीपक मनाङ्गे र उनका सहयोगी सर्लाहीका राजकुमार सिंहलाई प्रहरीले ठमेलबाट नियन्त्रणमा लियो। एउटा रेष्टुराँबाट निस्किएर ज्याठातर्फ जान पैदल हिँड्दै गर्दा उनीहरु पक्राउ परेका हुन्। दीपक मनाङगेले एक जना ब्यापारीलाई डर त्रास देखाएर रकम असुल्न लागेको सूचना सोह्रखुट्टे प्रहरीमा पुगेपछि उनको निगरानी गर्न सादा पोशाकमा प्रहरी खटाइएको थियो ।
प्रहरीका अनुसार एक जना व्यवसायीलाई बन्धक बनाएर डर धम्की दिई ५० हजार रकम असुलेपछि बाहिर निस्कदा उनी पक्राउ परेका हुन्। उनको साथबाट ५० हजार नगद बरामद गरिएको काठमाडौं प्रहरीका एसएसपी विक्रमसिंह थापाले जानकारी दिए। मनाङ्गेले रकम असुलेका ब्यापारीको नाम भने प्रहरीले सुरक्षाका कारण भन्दै सार्वजनिक गरेको छैन्।
पछिल्लो समय डान्सबार, रेष्टुरेन्ट, ठेकेदारहरुसँग रकम असुल्न थालेको भन्दै मनाङ्गे प्रहरीको निगरानीमा थिए। तर उनका विरुद्ध कसैले पनि प्रहरीसमक्ष उजुरी दिन आएका थिएनन्। तर प्रहरीले ती पीडितसामु पुगेर मनाङगेको चर्तिकला निगरानी गरिरहेको एसएसपी थापाले बताए।
लामो समयको निगरानीपछि मनाङ्गेलाई पक्राउ गरिएको उनले बताए। उनीमाथि प्रहरीले अपहरण गर्ने तथा शरिर बन्धक लिनेको महल तथा संगठित अपराध निवारण ऐन विरुद्ध मुद्ला चलाउने तयारी गरेको छ।
मनाङ्गेविरुद्ध सम्पत्ति सुद्धिकरण विभागमा समेत अकुत सम्पत्ति कमाएको अभियोगमा मुद्दा चलिरहेको छ।
को हुन् दीपक मनाङ्गे
२० वर्षअघि देखि उनी राजधानीको गुन्डागर्दीमा सम्लग्न भएको तथ्थांक प्रहरीसँग छ। १० कक्षा उतिर्ण मनाङ्गे गुन्डागर्दी सँर्गै ठेक्कापट्टा, होटल, डान्सबार र रेष्टुरेन्ट सञ्चालक बने।
रकम लगानी नगर्ने तर सेयर खोज्ने उनको बानी थियो। ठेक्कापट्टा, होटल, डान्सबार र रेष्टुरेन्ट संचालकले रकम नदिए उनले डर त्रास देखाउने गर्थे। ठमेल, पक्नाजोल र मेहपी क्षेत्र उनको गुन्डागर्दी गर्ने प्रमुख स्थल थियो।
राजनीतिमा लागेपछि आपराधलाई लुकाउन सकिन्छ भनेर उनी पछिल्लो समय नेपाली राजनीतिमा लागे। मनाङगेसंघीय समाजवादी पार्टीका केन्द्रीय उपाध्यक्षसमेत हुन्। मनाङ्गे दर्जनौं पटक प्रहरी हिरासतमा पुगिसकेका छन्।
२०६० साल पुस ११ गते चक्रे मिलनलाई धारिलो हतियार प्रयोग गरेको अभियोगमा उनी पक्राउ परेका थिए। जेल बसेर छुटेका मनाङ्गे त्यसपछि २०६५ साल फागुन १ र २०७० साल फागुन १४ गते पक्राउ परे।
सार्वजनिक मुद्दामा जेल परेका मनाङ्गे त्यसपछि फेरि गुन्डागर्दीमा नै सक्रिय रहिरहे। ४७ वर्षीय मनाङगेका ४ जना श्रीमती छन्। हाल उनले क्रसर उद्योगमा पनि लगानी गरेका छन्।
दिनेश अधिकारी चरी र कुमार घैंटेप्रहरी इन्काउन्टरमा मारिएपछि मनाङ्गे भूमिगत जस्तै भएर काम गर्थे। अरूलाई तर्साएर ब्यापारीलाई दुःख दिन थालेपछि मनाङ्गेलाई पक्राउ गरिएको एसएसपी थापाले बताए।
‘अरूले दुःख गरेर रकम कमाउने मनाङ्गे सरल तरिकाबाट असुल्ने? यो गुन्डाराज हो?’, यो एसएसपी थापाले भने। गुन्डाराजको कुनै पनि हालतमा सम्झौता नहुने भन्दै उनले त्यसलाई निर्मुल पार्न प्रहरी परिचालन गरिएको बताए।
ब्यापारीलाई लगानी गर्ने वातावरण गर्न नदिने, विभिन्न काममा अवरोध गर्ने, डर त्रास देखाउने गुन्डाराजविरुद्ध अप्रेसन सुरू भएको एसएसपी थापाले बताए। आवश्यक परे गुन्डाराज अन्त्यका लागि प्रहरी गोली चलाउनसमेत पछि नहट्ने उनले बताए।
setopati