असार १७, २०७३- पहिरोको जोखिम बढेपछि केरौंजा गाविसस्थित केरौंजा गाउँका भूकम्प पीडित अस्थायी टहरो छाडेर अन्यत्रै बसोबास गर्न थालेका छन् ।

जिल्ला दैवी प्रकोप उद्दार समितिका अनुसार त्यहाँका पीडित गाउँ छाडेर झण्डै आधा घण्टा माथिको बुट्यान जंगलमा बसोबास गर्न थालेका हुन् । ‘जंगल फाडेर त्रिपाल टाँग्न थालेका छौं’, स्थानीय
सुकबहादुर गुरुङले भने । बर्षातसँगै पहिरोको त्रासमा रहेको बस्तीमा झनै जोखिम बढेको हो । केरौंजा गाउँ र बेशीसहित सिमानामा पर्ने उहिया गाविसको खोर्लावेसी बस्ती पहिरोको जोखिममा परेको हो ।

भूकम्पलगत्तै आएको पहिरोले स्थानीयबासी त्रसित भएका थिए । वर्षातका कारण पहिरो खस्न थालेको गुरुङले जानकारी दिए । केरौंजा गाउँका दुईसय अस्थायी टहरोमध्ये एक सय १३ वटा पहिरोको उच्च जोखिममा परेका हुन् । वडा नम्बर १, २, ३ र ४ मा पहिरोको जोखिम बढेको स्थानियबासीको भनाइ छ । केरौंजा गाउँबाट सुरु भएको पहिरो बेसीको बस्ती हुँदै बुढीगण्डकी नदीमा मिसिएको छ ।

सोही करिब ५ किलोमिटर लामो पहिरोले बस्ती जोखिममा पारेको हो । ‘हिउँदमा पनि पहिरोबाट ढुङ्गा खसि रहन्थ्यो, पानी परेपछि डाँडै खस्न थाल्यो’, उनले भने ।

केरौंजा गाउँका १३ घर पहिरोले बगाएको समितिले जनाएको छ । खोर्लाबेसीका २१ घर जोखिममा परेका छन भने ७ वटा घरमा पानी पसेको हो । खोर्लाबेसीका बासिन्दा पनि बस्ती छाडेर नजिककै डाँडामा बसोबास गर्न थालेका छन् ।

पहिरो पीडितहरुलाई अस्थायी बसोबास गर्न समितिले त्रिपाल, टेण्ट उपलब्ध गराएको छ । गत बर्ष बैशाख १२ गतेको भूकम्प लगत्तै उक्त पहिरो खसेको थियो ।