असार ४, २०७३- नेपालगन्जबाट मुस्किलले एउटा वा दुई वटा उडान हुने हुम्लाको सिमकोट विमानस्थलका लागि शनिवार ३५ उडान भएका छन् । साँझ करिब ६ बजेसम्म ती उडानहरु भइरहे ।

हावाको चापले मध्यान्हपछि उडान नहुने सिमकोटका लागि शुक्रवारपनि साँझ ५ बजे सम्म २१ वटा उडान भएको थियो । तैपनि, ट्राभल एजेन्सी र एअरलाइन्सहरुको सेवा अपर्याप्त भईरहेको छ । सयौं यात्रुहरु तिब्बतको मानसरोवर(कैलाश पर्वत)  जाने पालो कुरेर नेपालगन्जका होटलहरुमा बसिरहेका छन् । भारतीय पर्यटकले भरिभराउ विमानस्थल साँघुरो भएको छ ।

मौसमी प्रतिकूलताले चाहे जति उडान हुन सकेका छैनन । त्यसमाथि सोमवारको पूणिर्मामा कैलाश दर्शन गर्न चाहने भारतीय धार्मिक पर्यटकको भीड थामिनसक्नु छ । नेपालगन्जका स्तरीय कुनै पनि होटलमा खाली कोठा छैन ।

मौसमी प्रतिकूलताले बेलैमा उडान नहुँदा तिर्थयात्रीहरु विमानस्थलमै विश्राम गरिरहेका छन् । कोही छिटो उड्न कामना गर्दै भजनर्कितन गरेको भेटिन्छन् । तारा, सिता, गोमा, सिमि्रक र मकालु एयरलाइन्सले सकेको जति उडान गर्दा पनि यात्रुहरु नेपालगन्ज र सिमकोटमा रोकिएर बस्नुपर्ने अबस्था आएको छ ।

दुई साताअघि भारतीय दुतावासले चीनको मानसरोवर कैलाश यात्रामा जाने आफ्ना नागरिकका लागि ‘ट्राभल एडभाइजरी’ जारी गर्दै सावधानी अपनाउन अपिल गरेको थियो । तर, कैलाश परिक्रमा गर्न जाने भारतीय पर्यटकको संख्या बढेको-बढ्यै छ ।

१८ पर्यटन कम्पनीहरुले झण्डै ८ हजार तिर्थयात्रीलाई यो बर्ष मानसरोवर कैलाश दर्शन गराउादैछन् । यसअघि बुद्धपूणिर्मामा कैलाश दर्शन गर्न सबैभन्दा धेरै भिड लागेको थियो । जुन महिनाको पूणिर्माका लागि २५ सय जनाले बुकिङ गरेको पर्यटन व्यवसायीले बताएका छन् । मे देखि सेम्टेम्बर मानसरोवर दर्शनको मुख्य मौसम हो ।

गत बर्षको भूकम्पपछि चीनले सिन्धुपाल्चोकको तातोपानी नाका बन्द गरेपछि कैलाश जाने सबै तिर्थयात्रीहरु नेपालगन्ज-सिमकोट-हिल्सा रुटबाट जान थालेका हुन् । अघिल्ला बर्षहरुमा झण्डै १५ हजार भारतीय पर्यटकले कैलाश दर्शन गर्थे । त्यसमध्ये हुम्लाहुँदै एक हजार पाँच सय जति पर्यटक मात्र जान्थे ।सिमकोटबाट पर्यटकहरु हेलिप्टरबाट हिल्सा पुगेर चीनको सीमा प्रवेश गर्छन ।