असार २, २०७३- सरकारले डेढ बर्षभित्र तीन वटा चुनाव गर्नेगरी समयतालिकासहितको संविधान कार्यान्वयन कार्ययोजना तयार गरेको छ । मन्त्रिपरिषद्को बिहीबारको बैठकले संविधान अनुसार गर्नुपर्ने कामहरुको कार्यतालिका पारित गरेको हो ।
जस अनुसार आउदो मंसिर भित्र स्थानीय तह, २०७४ जेठमा प्रदेश र २०७४ कात्तिक–मंसिर महिनामा प्रतिनिधि सभा र राष्ट्रिय सभाको निर्वाचन गर्ने उल्लेख छ । निर्वाचनका लागि गर्नुपर्ने संविधान अनुसार कामकारवाही पनि कार्ययोजनामा विस्तृत रुपमा उल्लेख गरिएको छ ।
‘संविधानले भने अनुसार काम समयमै सकियोस् भनेर सरकारले विस्तृत कार्ययोजना तयार गरेको हो’ कानूनमन्त्री अग्नि खरेलले कान्तिपुरसँग भने,‘ यो कार्ययोजनालाई संसदमा समेत पेश गरी अन्य दलहरुको सुझाव लिइनेछ । प्रमुख विपक्षी काग्रेसका नेताहरुले समेत कार्यतालिका सहित अघि बढ्नुपर्ने धारणा राख्न थालेपछि सरकारले समयसिमा सहितको कार्यतालिका तयार गरेको हो । ‘ संविधान कार्यान्वयन लागि अब समयसिमा तोकेर अघि नबढ्ने हो भने धेरै गार्हो हुनसक्ने भएकाले सरकारले कार्यतालिका बनाएको हो ।’
ekantipur