जेष्ठ २६, २०७३- ‘हामी उठ्ने छौं फाउण्डेशन’ले संयुक्त राष्ट्रसंघका महासचिव बान की मुनसहित शक्तिशाली पाँच मुलुकका राष्ट्रपतिलाई सगरमाथाबाट ल्याइएको ढुंगा उपहार दिएको छ ।
जलवायु परिवर्तनले सगरमाथालगायत नेपालको हिमालहरु पग्लिएर कालापत्थरमा परिणत बन्दै गएको सन्देश दिन फाउण्डेशनले अमेरिकी राष्ट्रपति बाराक ओबामा, चीनका राष्ट्रपति सि जिनपिङ, बेलायतका प्रधानमन्त्री डेभिड क्यामरुन र रुसका राष्ट्रपति भ्लादिमिर पुटिन र फ्रान्सका राष्ट्रपति फ्रास्वाँ होल्यान्डेलाई ढुंगा दिएको हो ।
मुनसहित अन्य पाँच जनालाई सम्वोधन गरी लेखिएको पत्रसहित ती ढुंगा यूवा तथा खेलकुदमन्त्री सत्यनारायण मण्डलले मंगलवार नेपालस्थित् संयुक्त राष्ट्रसंघ र दुतावासका प्रतिनिधिलाई हस्तान्तरण गरेका हुन् । ती ढुंगा ७ जेठमा सगरमाथा आरोहण गरेका फूर्वा छिरिङ शेर्पाले ल्याएका हुन् । यसअघि तत्कालिन प्रधानमन्त्री माधवकुमार नेपालले पनि जलवायु परिवर्तनका कारण हिमाल पग्लिएको सन्देश दिन ओबामालाई ढुंगा उपहार दिएका थिए ।
‘धनी मुलुकले उत्पादन गरेको प्रदूषणका कारण हाम्रा हिउँ पग्लिएका छन् भन्ने सन्देश दिन यी कालापत्थर काफी छन्,’ मन्त्री मण्डलले भने, ‘ठूला देशको मारमा हामी परेका छौं, यसमा उहाँहरुको ध्यान जाने विश्वास छ ।’
कार्यक्रममा फाउण्डेशनले सगरमाथा आरोहण गर्ने ३२ जनालाई सम्मानसमेत गरेको छ ।
ekantipur