के छ भिसाको बिशेषता
अध्यागमन विभागले मेसिन रिडेबल भिसा जारी गर्ने अन्तिम तयारी गरेको छ। अन्तर्राष्ट्रिय मापदण्ड अनुसार मेसिन रिडेबल भिसा जारी गर्न लागिएको अध्यागमन विभागका महानिर्देशक केदार न्यौपानेले सेतोपाटीलाई जानकारी दिए।
भिसा प्रक्रिया जारी गर्ने विषयमा सबै कामहरु सम्पन्न भइसकेको बताउँदै न्यौपानेले केहिदिनभित्रै जारी गरिने बताए। विश्वका अधिकांश देशहरुले मेसिन रिडेबल भिसा जारी गरेपनि नेपालले भने हस्तलिखित भिसा जारी गर्दै आएको थियो ।
अल्ट्रा भाइलेट रे बाट मेसिन रिडेबल भिसाको आधिकारिकता जाँच गर्न सकिने महानिर्देशक न्यौपानेले बताए। फोटो कपी गर्दा सेक्युरिटी फिचर कपी नहुने तथा अन्तर्राष्ट्रिय स्तरको मापदण्ड अनुसार भिसा बनाइएको उनले बताए। भिसामा नेपालको नक्सा, सरकारको लोगो र सगरमाथाको चित्र पनि राखिएको छ।
मेसिन रिडेबल भिसाको नमूना
मेसिन रिडेबल भिसा जाँच गर्नका लागि विभागले ४० वटा पासपोर्ट रिडेबल मेसिन पनि खरिद गरिसकेको छ। भिसा दिनका लागि ५ वटा किओस मेसिन पनि विभागले किनिसकेको छ। मेसिन रिडेबल भिसा जारी गरेपछि भिसाको मूल्य भने नबढ्ने महानिर्देशक न्यौपानेले बताए। नेपालले १५ दिनको लागि भिसा शुल्क २५ डलर, २० दिनका लागि ४० डलर र ९० दिनको लागि सय डलर लिदैँ आएको छ।
setopati