जेष्ठ २४, २०७३- प्रधानमन्त्री केपी शर्मा ओलीले २०७४ माघमा हुने निर्वाचनको परिणामले मात्रै सरकार परिवर्तन हुने दाबी गरेका छन् ।

काठमाडौं विश्वविद्यालय (केयु) को ७२ औँ सिनेट बैठकमा सहभागी हुन आएका प्रधानमन्त्री ओलीले तत्काल सरकार परिवर्तन हुने गरी कुनै सहमति नगरेको दाबी गरे । ‘सरकार परिवर्तन हुन्छ, परिवर्तन नहुने सरकार हुँदैन,’ छोटो प्रतिकृया दिएका उनले भने, ‘तर त्यसको मिति टुंगो भने लागेको छैन ।’

कुलपति समेत रहेका प्रधानमन्त्री ओली, सहकुलपति रहेका शिक्षामन्त्री गिरिराजमणि पोखरेल सहभागी सिनेट बैठकले आर्थिक बर्ष २०७३/७४ को लागि ३ अर्ब ३२ करोड ४६ लाखको बजेट पारित पनि पारित गरेको छ । प्राध्यापकहरुको तर्फबाट कार्यकारी परिषदमा डा. बिमप्रसाद श्रेष्ठलाई नियुक्त पनि गरेको छ । आर्थिक बर्ष २०७१/७२ को लेखा परिक्षण प्रतिवेदन र २०७२/७३ को प्रगति प्रतिवेदन पारित गरेको रजिष्ट्रार डा. भोला थापाले जानकारी दिए ।