बिकास मरहट्टा/गोरखा
जेष्ठ १४ गते । जिल्लामा संचालित एम्वुलेन्सहरुले जिल्ला वाहिर जानुपर्ने बिरामीलाइ सेवा दिन आनाकानी गर्ने गरेका छन् । जिल्ला वाहिर जानुभन्दा लोकल टिप गरेमा बढि नाफा हुने भन्दै एम्वुलेन्स चालकहरु जिल्ला वाहिर जान नमान्ने गरेका हुन् ।
सेवा भन्दा कमिसनको खेलमा लागेकाले एम्वुलेन्स चालकहरु जिल्ला वाहिर जान आनाकानी गर्ने गरेको स्रोतको दावी छ । ‘एक पटक लोकल टिप गर्दा चालकले पचास रुपैया कमिसन पाउछन्’ स्रोत भन्छ ‘यहि बसेर दिनको दश टिप गरेभने त पाँच सय कमिसन पाउने भए ।’ तर जिल्ला बाहिर जादाँ कमिसनमा घाटा हुने भन्दै चालकहरु जान नमान्ने स्रोतको भनाइ छ ।
बिरामीको सेवाका लागी एम्वुलेन्स ल्याइएपनि आवश्यक परेको बेला बिरामीले सेवा पाउन सकेका छैनन् ।
जिल्ला वाहिर जानका लागी आग्रह गर्दा एम्वुलेन्स चालकहरुले पनि बिभिन्न वहाना बनाउने गरेको गोरखा नगरपालिका–६ का राजकुमार श्रेष्ठले बताए । ‘मेरो छोरीलाइ एपेन्डिसाइड भएर काठमाडौ लान एम्वुलेन्सहरुलाइ सम्पर्क गरे तर सबैले अनेक बहाना बनाएर जानै मानेनन्’ श्रेष्ठले भने ‘बल्ल बल्ल अस्पतालमार्गमा रहेको मनास्लु बचत तथा ऋण सहकारी संस्थाको एम्वुलेन्स पाइयो तर मुग्लिनमा ओरालेर नारायणगढ बाट आएको एम्वुलेन्समा चढाइदियो ।’
एम्वुलेन्सले समेत बिच बाटोमै बिरामीलाइ बेच्ने गरेपछि बिरामीहरु थप मारमा परेका छन् । सदरमुकाममा करिव ९ वटा एम्वुलेन्सले सेवा दिदै आएको छ । तर आवश्यक परेको बेला एम्वुलेन्स नपाइने स्थानियहरुको गुनासो छ । त्यति मात्र होइन आवश्यक परेको बेला फोन नउठाउने गरेको सेवाग्राहिको गुनासो छ । जिल्लामा सेवा दिदै आएका अधिकांश एम्वुलेन्सहरु थोत्रा र पुराना भइसकेको छन् ।
मनास्लु बचत तथा ऋण सहकारी संस्थाको टायरको धागो निस्किएको छ, भिमसेनलाल स्मृति प्रतिष्ठानको साइरन छैन, रेडक्रस जिल्ला शाखा गोरखाको बिग्रीएर थन्किएको छ । अन्य एम्वुलेन्सको भने चालक पाउन समस्या हुने गरेको सेवाग्राहिको गुनासो छ । जिल्लामा एम्वुलेन्स सेवा प्रभावकारी नभएको भन्दै केहि समय अघि सेवाग्राहि प्रशासनमा डेलिकेसन समेत गएका थिए । तर प्रशासनले भने वास्ता नगरेको उनीहरुले बताएका छन् । जसका कारण सेवाग्राहिहरु थप मारमा पर्ने गरेका छन् ।
