जेष्ठ ७, २०७३- बुद्धस्थल लुम्बिनी नव दुलहीजस्तै चिटिक्क सिंगारिएको छ । ठाउँठाउँमा स्वागतद्वार निर्माण गरिएका छन् । २५६० औं बुद्धजयन्ती मनाउनका लागि यहाँ चहलपहल बढेको छ । शनिवार औपचारीक कार्यक्रम गरी बुद्धजयन्ती मनाइदैछ ।
स्वदेशी विदेशी पर्यटकले लुम्बिनी भरिभराउ बन्दै गएकोछ । विभिन्न मुलुकका बौद्ध विहार र गुम्बा लुङ्दा र ध्वजापताकाले सजाइएका छन् । लुम्बिनी स्वागत गर्न तम्तयार जस्तै बनेको छ ।
विभिन्न विहार र टेम्पलमा पूजाआजा थालिएको छ । ठाउँठाउँमा विश्वशान्ति र धर्मदेशनाको कामना गर्दै मंगल धुन बजाएर माहोल शान्तिप्रति समर्पित गरिएको छ ।
मायादेबी मन्दिर र पुष्करणी पोखरीलाई रंगरोगन र रंगीविरगंी बत्ती टाँगेर सजाइएको छ । सरसफाई गरी चिटिक्क बनाइएको छ ।
सजावटका लागि सेना, प्रहरी, सशस्त्र र लुम्विनी विकास कोष कर्मचारी अहोरात्र खटेका छन् ।
