नवीनराज कुइँकेल
बेसीशहर, जेठ १ गते । मनाङ र मुस्ताङको सिमानामा रहेको सारेबुङ हिमाल बेसक्याम्पमा अलपत्र दुई विदेशीसहित २० जना नेपालीको उद्धार गरिएको छ ।
शुक्रबारदेखि अलपत्र परेका उनीहरुलाई शनिबार उद्धार गरि दुई विदेशी र दुई नेपालीलाई काठमाण्डौँ पु¥याइएको छ । आरोही टिममा रहेका १६ जना नेपाली नागरिकलाई भने मनाङको फु गाविस वडा नं. ९ मा रहेको गुम्बामा राखिएको छ ।
५ हजार ९ सय मिटर उचाईको सारेबुङ बेसक्याम्पबाट उद्दार गरिएका आरोहीलाई मनाङको चामेबाट काठमाण्डौतर्फ लगिदैं । तस्विर सौजन्य ः दिलेन्द्र पन्त, सहायक प्रजिअ मनाङ ।
मनाङका प्रमुख जिल्ला अधिकारी भीमकान्त शर्माका अनुसार उद्दार गरिएका मध्ये नुवाकोट लप्चाङ–३ का वर्ष २६ का होमबहादुर गलान, वर्ष १९ का आइते तामाङ र जर्मनी नागरिक ४८ वर्षीय टोबियस् ग्रोएनेन र ४४ वर्षीया गुड्रन इग्रीड जिगर्मनलाई काठमाण्डौ पठाइएको हो । दुई नेपाली विरामी अबस्थामा छन । हाइअल्टिच्युटका कारण उनीहरुमा हातखुट्टा झमझमाउने, आँखा नदेख्ने समस्या देखिएको मनाङका सहायक प्रमुख जिल्ला अधिकारी दिलेन्द्र पन्तले जानकारी दिनुभयो ।
झण्डै छ हजार मिटर उचाईमा अलपत्र परेका पर्यटकसहितको समूहलाई पाँच हजार मिटर हुँदै तीन हजार मिटर उचाईको फु गाउँमा पु¥याइएको थियो । उद्दारमा सिम्रिक एयरको दुईवटा हेलिकप्टर प्रयोग गरिएको थियो । १९ हजार फिटबाट डोरीको सहायताले उद्दार गरिएको पाइलट विवेक खड्काले बताउनुभयो ।
छ हजार तीन सय ४६ मिटर मिटर उचाईको सारेबुङ हिमाल बेसम्याम्पमा बसेको टोली हिमआँधीका कारण टेन्ट उडाएपछि अलपत्र परेको थियो । शुक्रबार अचानक आएको हिमआँधीले टेन्ट, ओढ्ने ओछ्याउने, पकाउने भाँडा, स्टोभ, खाद्यान्न लगायत उडाएपछि उनीहरु अलपत्र परेका थिए । शुक्रबार नै उद्दारको प्रयास गरिएपनि मौसम प्रतिकुलताका कारण सम्भव नभएको मनाङका प्रहरी नायव उपरिक्षक जगन्नाथ गौतमले बताउनुभयो ।
टोलीमा जर्मन दम्पती ४८ वर्षीय टोबियस् ग्रोएनेन र ४४ वर्षीया गुड्रन इग्रीड जिगर्मन रहेका मनाङ प्रशासनले जनाएको छ । टोबियस् नेशनल जियोग्राफी च्यानलका पत्रकार रहेको मनाङ प्रशासनले जनाएको छ । नेपालीहरु एकजना गाइड, एकजना क्लाइम्बिङ शेर्पा, एक बेस क्याम्प शेर्पा, एक जना भान्छे, एकजना किचन ब्वाई र १३ जना भरिया छन् ।
मनाङ प्रहरीका अनुसार उनीहरु मुस्ताङको दमोदर कुण्ड अवलोकन गरि सारेबुङ हिमाल चढेर मनाङतर्फ झर्दै थिए । हिमालबाट झरेर फेदीमा बस्दै गर्दा हिमआँधीले बसैकै ठाउँबाट उनीहरुका सबै सामान उडाएको थियो ।
gorkhapatraonline