जेष्ठ १, २०७३- नेकपा क्रान्तिकारी माओवादीका अध्यक्ष मोहन वैद्यले एमाओवादीसँग भएको पार्टी एकता षड्यन्त्र भएको टिप्पणी गरेका छन् ।

महासचिव रामबहादुर थापा पक्षधरले अलग्गै केन्द्रीय समिति बैठक बसेर पार्टी एकता अभियान सुरु गरेलगत्तै अपिल प्रकाशिन गरेका वैद्यले त्यसमा सकारात्मक र नकारात्मक दुवै पाटो रहेको बताए । ‘क्रान्तिकारी जनसमुदाय, शुभचिन्तक तथा नेता–कार्यकर्ताको एउटा हिस्साले सच्चा कम्युनिस्टहरूसहित क्रान्तिकारी माओवादीहरू एकताबद्ध होऊन् र तिनले क्रान्तिलाई विजयको दिशातिर अगाडि बढाऊन् भन्ने रहेको छ । यो एकताको सकारात्मक पाटो हो,’ एकको स्वागत र सम्मान गर्नुपर्ने बताउँदै अपिलमा भनेका छन्, ‘परन्तु, अर्कोतिर साम्राज्यवादी, विस्तारवादी, घरेलु प्रतिक्रियावादी र दक्षिणपन्थी संशोधनवादीहरूले एकताको प्रक्रियामा गएर क्रान्तिकारी धाराको अवसान होओस् र त्यो संसदवाद एवम् दक्षिणपन्थी भासमा चुर्लुम्मै डुबोस् भन्ने चाहन्छन् । त्यहाँ छलछाम र षड्यन्त्र छ । यो एकताको नकारात्मक पाटो हो ।’

वैद्यले आफूलाई थाहै नदिई एमाओवादीसित वार्ता अगाडि बढाएपछि केन्द्रीय समिति बैठक स्थगित गरेको बताएका छन् । ‘यसप्रकारको जटिल स्थितिमा स्थगित केन्द्रीय समिति बैठक जेठ १ गते राखिएकोमा त्यो पनि स्थगन गर्न बाध्य हुनुपर्‍यो,’ उनले भनेका छन् ।