२५६० औं वुद्ध जयन्ती र अन्तर्राष्ट्रिय बौद्ध सम्मेलन नजिकिंदै जाँदा वुद्ध जन्मस्थल लुम्बिनीमा बिशेष सुरक्षा रणनीति लागू गरिएको छ ।

वुद्ध जयन्तीको मूख्य कार्यक्रम ८ जेठमा भए पनि लुम्बिनीमा एक साताअघिदेखि नै देशविदेशका पर्यटकहरु आउने क्रम बढेको छ । यो वर्ष राजधानीमा वुद्धसम्मेलन लगत्तै सम्मेलनमा सहभागी हुने २५ देशका पाहुना लुम्बिनी समेत आउने तयारीमा छन् ।

सबै पाहुना र पर्यटकहरुको सुरक्षार्थ लुम्बिनी अञ्चल प्रहरी कार्यालयको अगुवाईमा तीन तहको सुरक्षा रणनीति अनुसार सुरक्षाकर्मी तयार गरिएको लुम्बिनी प्रहरी प्रमुख एसएसपी शेरबहादुर वस्नेतले बताए ।

सुरक्षा व्यवस्थाको लागि पश्चिम क्षेत्रीय प्रहरी कार्यालय मातहतमा रहेका अञ्चल प्रहरी कार्यालय, क्षेत्रीय प्रहरी तालिम केन्द्र, दंगा प्रहरी गण लगायत पोखराबाट पनि थप प्रहरीको माग गर्ने तयारी गरिएको छ ।

त्यसैगरी भीडभाडको समयमा पर्यटकलाई चेकजाँच गर्दा उनीहरुको सुविधामा ख्याल राख्ने, पर्यटक र पाहुनालाई बिशेष सुरक्षा दिने साथै पर्यटकमैत्री ब्यबहार गर्ने लगायतका योजना बनेको सुरक्षा निकायले जनाएको छ ।

पर्यटन मन्त्रालयले यस क्षेत्रका पर्यटन, जनपथ, सशस्त्र र ट्राफिक प्रहरीहरुसँग समन्वय गरी त्यस्तो रणनीति बनाएको पर्यटन प्रहरी कार्यालय काठमाडौका इन्चार्ज प्रहरी निरीक्षक तुलसा खतिवडाले बताईन ।

पर्यटकसंग पर्यटन प्रहरीले जस्तै पर्यटकमैत्री ब्यबहार गर्न अन्य प्रहरीहरुलाई पनि सिकाइएको उनले बताईन् ।

बिभिन्न आन्दोलन, तालाबन्दी लगायतका गतिबिधिहरुले लुम्बिनीमा पटक पटक असहज बातावरण बन्दै आएको थियो ।
दीपक ज्ञवाली, बुटवल