बीरगन्ज ,बैशाख ३१ गते । नारायणी उप–क्षेत्रिय अस्पताल बीरगन्जमा कार्यरत्त स्वास्थ्यकर्मी बृजकुमार बैठाले आफनो नामको अगाडी चिकित्सक ( डा.)  लेखी नेपाल मेडिकल काउन्सिलको नम्बरसमेत प्रयोग गरी ठगी गरेको आरोपमा जिल्ला प्रहरी कार्यालय पर्साले  पक्राउ गरि अनुसन्धान गरिहेको प्रहरी उपरीक्षक राजुबाबु श्रेष्ठले बताउनु भएको छ ।

बैठाले नारायणी उप–क्षेत्रीय अस्पतालमा उपचारका लागि आएका बारा जिल्ला सिसवा महेशपुर निवासी गोरख चौधरीलाई अस्पतालमा बेड खाली नभएको भनी आकस्मिक कक्षबाट बीरगन्ज नगवास्थित आफ्नो निजी युनिक हेल्थ क्लिनिकमा भर्ना गरेका थिए ।  आकस्मिक कक्षबाट रेफर गर्दा बैठाले आफ्नो लेटर प्याड प्रयोग गरेको र त्यसमा डा. बुजकुमार बैठा लेखी काउन्सिलको १०१४४ नम्बर समेत उल्लेख गरेकोले प्रहरीले बैठालाई पक्राउ गरि आवश्यक अनुसन्धान गर्न पर्सा जिल्ला अदलतबाट छ दिनको म्याद लिएर अनुसन्धान गरिरहेको प्रहरी उपरीक्षक श्रेष्ठले बताउनु भयो । उपचारका क्रममा चौधरीलाई पक्षघात भएपछि उहाँका ज्वाईले प्रहरीमा उजुरी गरेपछि प्रहरीले पक्राउ गरेको हो ।

प्रहरीको अनुसन्धानमा रहेका बैठा नारायणी उप–क्षेत्रीय अस्पतालको कर्मचारी भए पनि चिकित्सक ( डा.) नभएको अस्पतालका प्रमुख डा. रामपरीक्षण यादबले बताउनु भएको छ ।

रासस