फोटो :फाइल फोटो
सन्तोष घिमिरे
काठमाडौंः सरकारले नयाँ दिल्लीस्थित नेपाली राजदूत दीपकुमार उपाध्यायलाई फिर्ता आउन औपचारिक पत्र पठाएको छ ।
‘उपाध्यायलाई फिर्ता आउन आइतबार औपचारिक पत्र पठाइएको हो । बिदाई भेटहरु सकेर उहाँ चाँडै फर्किनुहुन्छ होला’ परराष्ट्र मन्त्रालयका प्रवक्ता ताराप्रसाद पोख्रेलले अन्नपूर्णसँग भने ।
परराष्ट्र सचिव शंकर दास बैरागीले टेलिफोनमार्पmत् गत शुक्रबार राजदूत उपाध्यायलाई फिर्ता बोलाउने सरकारको निर्णय रहेको जानकारी गराएका थिए ।
सरकार ढाल्न सक्रिय भूमिका खेलेको भन्दै मन्त्रिपरिषद्ले गत शुक्रबार राजदूत उपाध्यायलाई फिर्ता बोलाउने निर्णय गरेको थियो । शेर बहादुर देउवा कांग्रेस सभापतिमा निर्वाचित भएयता राजदूत उपाध्याय कंग्रेसकै प्रतिनिधीझैँ गरी काम गर्न थालेको तथा ओली नेतृत्वको वर्तमान सरकार ढाल्न भूमिका खेलेको आरोपमा राजदूत उपाध्यायलाई फिर्ता बोलाउने निर्णय सरकारले गरेको थियो ।
राजदूत उपाध्यायलाई परराष्ट्र मन्त्रालयको समन्वय बिना आफ्नो कार्यक्षेत्र छाडेको समेत आरोप लागेको छ । सरकारको जानकारी बेगर नेपालस्थित भारतीय राजदूत रञ्जित रेसँग मिलेर तराईमा भएका कार्यक्रमहरुमा सहभागी भएको आरोप पनि लागेको थियो ।
त्यस्तै मधेसी मोर्चाका नेताहरुलाई भेटेर सरकारविरुद्ध निरन्तर उकासिरहेको आरोप समेत उनीमाथि लगाइएको थियो ।
उपाध्यायले राष्ट्रपतिको भारत भ्रमणका लागि पूर्ण तयारी भइसकेको अवस्थामा भ्रमण रोक्दा कुटनीतिक रुपमा राम्रो सन्देश नजाने भन्दै प्रधानमन्त्री ओलीसँग विमति देखाएका थिए । सुशील कोइराला नेतृत्वको सरकारले डेढ बर्षअघि उपाध्यायलाई भारतका लागि राजदूत नियुक्त गरेको थियो ।
annapurnapost
