वैशाख २७, २०७३- महानगरिय प्रहरी अपराध महाशाखाले श्रमका निम्ती विदेश हिँडेका एक कामदारलाई त्रिभुवन अन्तराष्ट्रिय विमानस्थलबाट पक्राउ गरेको छ ।

पहिलोपटक विदेश जान लागेको मुना विश्वकर्मा र उर्मिला श्रेष्ठको पासपोर्टमा रि–ईन्ट्रीको भिसा हानिएको छ । प्रहरी स्रोतका अनुसार वैदेशिक रोजगार व्यवसायीको मिलेमतोमा यस्तो अवैध काम भएको हो ।

विमानस्थलबाट कामदार पक्राउ परेसँगै महानगरिय प्रहरी अपराध महाशाखाले वैदेशिक राेजगार विभागमा पनि छापा मारेकाे छ । विभागकाे ताहचलस्थित श्रम स्विकृती शाखालाई नियन्त्रणमा लिएर प्रहरी टाेलीले अनुशन्धान गरिरहेकाे छ । प्रहरी स्राेतका अनुसार कर्मचारीकाे मिलाेमताेबीना अवैध काम हुन नसक्ने भन्दै विभागमा पनि छापा मारिएकाे हाे ।

यस्तै प्रहरी टाेलीले गाैशलास्थित हिमालय रेन्डपान्डा ट्राभल, किङ अकबर टुर एन्ड ट्राभल र सिटी टुर एन्ड ट्राभल र इन्टरनेशनल ट्रेड लिंकमा पनि छापा मारेकाे छ । त्यहाँबाट प्रहरी नक्कली हाेलाेग्राम तथा श्रम स्विकृतीकाे स्टिकरहरु फेला पारेकाे स्राेतले जानकारी दिएकाे छ ।

स्रोतका अनुसार यसरी रि–ईन्ट्रीको भिसामा कामदारलाई पठाउने यो पहिलो घटना भने होइन ।

विभागका ताहचल शाखा प्रमुख शत्रुघ्नप्रसाद साहले अहिले कार्यालय प्रहरीको नियन्त्रणमा रहेको पुष्टि गर्दै प्रहरी अनुसन्धान सकिएपछि कार्यालयको काम सूचारु हुने जानकारी दिए ।