फोटो :फाइल
काठमाडौँः बुधबार दिउँसो राष्ट्रपति विद्या भण्डारीलाई भेट्न प्रधानमन्त्री केपी शर्मा ओली सितलनिवास पुगेका छन् ।
एकीकृत माओवादीका अध्यक्ष पुष्पकमल दाहाल ‘प्रचण्ड’ले नयाँ सरकार गठनका सम्बन्धमा एमाओवादीले गरेको निर्णयबारे जानकारी गराएलगत्तै प्रधानमन्त्री ओली सितलनिवास पुगेका हुन् ।
प्रधानमन्त्री र राष्ट्रपतिबीचको भेटमा पछिल्लो विकसित राजनीतिक घटनाक्रमका बारेमा छलफल भएको प्रधानमन्त्रीका प्रेस संयोजक चेतन अधिकारीले अन्नपूर्ण अनलाइनलाई जानकारी दिए ।
अधिकारीले भने, ‘राष्ट्रपतिसँगको भेटमा पछिल्लो राजनीतिक घटनाक्रमका बारेमा कुराकानी भएको छ ।’ वालुवाटार स्रोतले प्रधानमन्त्री र राष्ट्रपतिको भेटलाई नियमति भेटवार्ता भएको समेत बताएको छ ।
बुधबार बिहान एकीकृत माओवादीले पार्टी अध्यक्ष प्रचण्डको नेतृत्वमा सरकार गठन गर्ने औपचारिक निर्णय गरे लगत्तै प्रधानमन्त्री ओलीलाई भेटेर प्रचण्डले पार्टीको निर्णयबारे जानकारी गराएका थिए ।
एमाओवादीले कांग्रेसको समर्थनमा प्रचण्ड नेतृत्वमा सरकार गठनका लागि सत्तारुढ दलसँग औपचारिक आग्रह गरेपछि बुधबार दिनभर शीर्ष तहको राजनीतिक भेटवार्ता चलेको छ ।
राष्ट्रपतिलाई भेटेर फर्किए लगत्तै प्रधानमन्त्री ओलीले सत्ता साझेदार दलको संयुक्त बैठक बोलाएका छन् ।
annapurnapost
