वैशाख २२, २०७३- सरकारविरुद्ध अविश्वास प्रस्ताव ल्याउनेसम्मको प्रयोजनका लागि हुने गरी नेपाली कांग्रेसले खाली कागजमा सांसदहरुको हस्ताक्षर संलकन गर्न थालेको छ । पार्टी सभापति शेरबहादुर देउवाले पहिलो हस्ताक्षर गरेका छन् ।

के प्रयोजनका लागि भन्ने हस्ताक्षर गरिएको हो भन्ने चाहिँ  कागजमा उल्लेख गरिएको छ । एमाओवादीले आफ्नै नेतृत्वमा सरकार निर्माणका लागि अपिल गरे लगत्तै ओली सरकार धरापमा परेको छ । कांग्रेसले एमाओवादी नेतृत्वमा सरकार बनाउने संकेत दिइसकेको छ ।

यसअघि काग्रेसले संसदमा स्थगन प्रस्ताव ल्याउनका लागि मात्र हस्ताक्षर थाल्ने निर्णय गरेको थियो । तर, अब सरकार नै ढाल्न सकिने बुझेपछि अविश्वासको प्रस्ताव ल्याउनेसम्मको प्रयोजनका लागि बुधबार सभापति देउवाबाटै हस्ताक्षर थालिएको हो । कांग्रेसले संसद भवनमा मधेसी दलहरुसँग छलफल गरिरहेको छ ।  काग्रेस सांसद रामहरि खतिवडाले हस्ताक्षर जे प्रयोजनका लागि पनि प्रयोग हुनसक्ने बताए ।

आजै कांग्रेसले नयाँ सरकारबारे मधेसी मोर्चासँग पनि वार्ता गरेको छ ।