वैशाख २२, २०७३- उपप्रधान, परराष्ट्र तथा स्थानीय विकासमन्त्री कमल थापाले एकिकृत माओवादीलाई निर्णयमा पुनर्विचार गर्न आग्रह गरेका छन् । एमाओवादीले अहिलेको सरकार ढालेर प्रचण्डको नेतृत्वमा सरकार बनाउने निर्णय गरेको छ ।

मिडिया नेपालले हेटौँडामा बुधबार गरेको साक्षात्कार कार्यक्रममा बोल्दै उपप्रधानमन्त्री थापाले सरकार गिराउने खेलमा नलाग्न एकिकृत नेकपा माओवादीका अध्यक्ष प्रचण्डलाई आग्रह गरेका हुन् । पदको लोभमा परेर सरकार ढाल्ने खेलमा नलाग्न थापाले एमाओवादी अध्यक्ष प्रचण्डलाई सुझाएका थिए ।

‘सरकार सञ्चालन गर्ने राजनीतिक संयन्त्रको अध्यक्ष प्रचण्ड आफैं हुनुहुन्छ,’ मन्त्री थापाले भने, ‘विस्तारै गति लिन थालेको बेला सरकार परिवर्तनको कुरा उपयुक्त हुँदैन र अप्रत्याशित रुपमा आएको छ ।’

सरकारले जनअपेक्षा अनुरुप काम गर्न नसकेको स्वीकार गर्दै मन्त्री थापाले सरकारको सफलता/असफलताको जस सरकारमा सहभागी सबै दलहरुको रहेको टिप्पणी गर्दै भने, ‘अरुलाई दोष दिएर एमाओवादीले सरकारको असफलताबाट पन्छिन मिल्दैन ।’

अहिलेको सरकार निकै विषम परिस्थितिमा गठन भएको भन्दै थापाले फेरि सत्ता केन्द्रित फोहोरी खेलले राजनीतिक स्थिरता र शान्तिप्रक्रियामा गम्भीर असर पुग्ने बताए । पछिल्लो समय विकसित परिस्थिति अप्रत्याशित रहेको विचार व्यक्त गर्दै थापाले भने, ‘फेरि सरकार ढाल्ने खेल सुरु हुँदा राष्ट्रिय स्वाभिमान र सार्वभौमिकतामा आँच आउँछ । संविधान कार्यान्वयनको पक्षमा पनि गम्भीर असर पुग्छ ।’

परिस्थितिजन्य बाध्यताका कारण आफूहरु सरकारमा सहभागी भएको भन्दै थापाले पछिल्लो समय विकसित राजनीतिक घटनाक्रमको समीक्षा बुधबार बस्ने पार्टी केन्द्रीय कमिटि बैठकमा गरेर निर्णयमा पुगिने बताए ।