वैशाख २२, २०७३- ‘गोरखा भूकम्प’को एकवर्षपछि परकम्प क्रमशः कम हुँदै गएपनि साना भूकम्प जाने क्रम जारी छ ।

भूकम्पको केन्द्रबिन्दु आसपासका क्षेत्रमा परकम्प जाने क्रम रोकिए पनि नयाँ स्थानमा साना भूकम्पहरु पातलो सङ्ख्यामा गइरहेका खानी तथा भूगर्भ विभाग, राष्ट्रिय भूकम्प मापन केन्द्रले जनाएको छ । केन्द्रका प्रमुख लोकविजय अधिकारीले परकम्प पातलिए पनि केही दिनयता साना भूकम्प गइरहेको बताए ।

उनका अनुसार आज दिउँसो कालिकोट केन्द्रविन्दु भएर ४ रेक्टर स्केलको भूकम्प गएको छ । यसअघि १८ गते बझाङ केन्द्रबिन्दु भई ४.२ रेक्टरको भूकम्प गएको थियो । अघिल्लो वर्ष वैशाख १२ को ७.६ रेक्टर स्केलको गोरखा भूकम्पपछि हालसम्म ४ रेक्टर स्केलभन्दा माथिका ४ सय ५० भन्दा बढी परकम्प गएको केन्द्रले जनाएको छ ।

गोरखा भूकम्पको एकवर्ष पुगेको दिन अर्थात् वैशाख १२ गते नुवाकोट ४.२ र १४ गते ४.३ रेक्टर स्केलको परकम्प गएको थियो । त्यसयता परकम्प गएको छैन, यो बीचमा दुई वटा नयाँ भूकम्प गएका हुन् ।