पूर्वप्रधानमन्त्री डा. वावुराम भट्टराई संयोजक रहेको नयाँ शक्ति नेपालले आर्थिक संकलनका लागि दुई महिना घरदैलो अभियान थाल्ने भएको छ।
नयाँ शक्तिका संयोजक भट्टराईले बिहीवार एक अपिल पत्र जारी गरी पार्टी स्थापनाका लागि आउँदो जेठ ३० देखि ३२ सम्म राष्ट्रिय भेला गर्न लागेकाले आर्थिक संकलनका लागि घर दैलो अभियान सुरु गर्न लागेको जनाएका छन्।
भेलाका लागि गर्न लागिएको आर्थिक संकलन र घरदैलो अभियान वैशाख र जेठ गरी दुई महिनासम्म चल्नेछ। भट्टराईद्वारा जारी गरिएको अपिलमा नयाँ शक्ति नेपालका आधिकारिक परिचयपत्र, प्रचार सामग्री र सहयोगका लागि गरिएका अपिलसहित कम्तिमा पाँच जनाको समूह आर्थिक सहयोगका लागि घरदैलौ कार्यक्रममा जाने उल्लेख छ।
‘हामी विश्वास दिलाउन चाहन्छौं तपाईले दिनु भएको सहयोग पारदर्शी गरिनेछ। यो रकम कुनै व्यक्तिगत प्रायोजन र स्वार्थमा खर्च गरिने छैन,’ अपिलमा भनिएको छ। आर्थिक सहयोग लिएपछि रसिद दिएर दर्ता पुस्तिकामा विवरण चढाएर दाताको दस्तखत लिइने उल्लेख छ।
नयाँ शक्ति नेपालले १० हजारभन्दा बढी आर्थिक सहयोग भने बैँक चेकमार्फत मात्रै लिने जनाएको छ।
setopati