फोटो :फाइल फोटो
काठमाडौं: दुई वर्षदेखि रोकिएको सगरमाथा आरोहण यो वर्ष सुचारु हुने भएको छ । सन् २०१६ को आरोहण सिजन वसन्त ऋतुमा सगरमाथा आरोहणमा जान ३२ वटा टोलीका दुई सय ८० जनाले अनुमति लिएर गन्तव्यतर्फ हिँडिसकेको पर्यटन विभागले जानकारी दिएको छ।
एकजना नेपालीसहितको यो टोली आगामी मे महिनामा सगरमाथा आरोहण गर्ने उद्देश्यले बढीमा ७५ दिनको समय लिएर काठमाडौंबाट प्रस्थान गरिसकेको विभागका पर्वतारोहण शाखा अधिकृत ज्ञानेन्द्र श्रेष्ठले जानकारी दिए।
अघिल्लो वर्ष सन् २०१५ मा ४२ वटा टोलीका तीन सय ५७ जना विभागबाट अनुमति लिएर सगरमाथा आरोहणका लागि गएको भए पनि प्राकृतिक विपत्तिका कारण आरोहण सफल हुन सकेको थिएन। गत वर्ष सगरमाथा आरोहणको मुख्य सिजन सुरु भएको समय (वैशाख १२) मा गएको भूकम्पका कारण सगरामाथा आरोहण पूरै प्रभावित भयो।
अघिल्लो वर्ष सन् २०१४ मा सगरमाथा क्षेत्रमा गएको हिउँपहिरोका कारण आरोहण सफल हुन सकेको थिएन।सगरमाथा आरोहणका लागि नेपालीले प्रतिव्यक्ति ७५ हजार रुपैयाँ र विदेशीले प्रतिव्यक्ति ११ हजार डलर शुल्क आरोहण अनुमतिबापत सरकारलाई बुझाउनुपर्ने व्यवस्था छ।
सन् २०१४ मा आरोहण अनुमति लिएका आरोही पनि आएकोले गत वर्ष ४२ वटा टोली पुगेका थिए। सरकारले भूकम्पबाट प्रभावितको हकमा निर्णय ढिलो गरेकाले यो वर्ष अपेच्छाअनुसार पर्वतारोही आउन नसकेको नेपाल पर्यटतारोहण संघका अध्यक्ष आङछिरिङ शेर्पाले बताए।
उनका अनुसार दुई वर्षदेखि रोकिएको अवस्थामा यो वर्ष निकै चापाचाप हुने अवस्था भए पनि सरकारले भूकम्पबाट प्रभावित भएर गत वर्ष आरोहण गर्न नपाउनेका लागि गत फेब्रुअरीको अन्तिममा मात्रै दुई वर्षभित्रमा आरोहण गर्न सक्ने गरी निर्णय गरेको हो।
सरकारी निर्णय ढिलो भएकोले यो वर्ष गत वर्ष आएका आरोही आउन भ्याएनन्। यी आरोही सबै आगामी वर्ष सन् २०१७ मा मात्रै आउने भएकोले आउँदो वर्ष भने सगरथामा आरोहणमा बढी भीडभाड हुने अनुमान पर्वतारोहण संघको छ।
आरोहणका लागि सगरमाथा प्रदूषण नियन्त्रण समितिले आवश्यक बन्दोबस्त मिलाइसकेको छ। आइसफल डाक्टरले आरोहणमा जाने बाटोसमेत बनाइसकेको जानकारी पर्यटन विभागले दिएको छ।
annapurnapos
